Հայաստանը միացավ ԵԱՏՄ տարածքով վնասակար թափոնների տեղափումը կարգավորող համաձայնագրին

Հայաստանի կառավարությունը հավանություն տվեց «Եվրասիական տնտեսական միության մաքսային տարածքով վնասակար թափոնների անդրսահմանային տեղափոխման մասին» համաձայնագրի ստորագրման առաջակությանը:

Համաձայնագիրը կրկնում է վտանգավոր թափոնների կառավարման Բազելյան կոնվենցիայի դրույթները: Այն ընդգծում է մի երկրից մյուս երկիր վտանգավոր թափոնների տեղափոխման անթույլատրելիությունը՝ դրանց թաղման և վերամշակման նպատակով:

Ընդ որում նշվում է, որ դա չի տարածվում ռադիոակտիվ թափոնների վրա, ինչպես նաև այն չի արգելում հայկական ատոմակայանից օգտագործված միջուկային վառելիքի և թափոնների տեղափոխումը Ռուսաստան: Սահմանափակումները վերաբերում են բացառապես քիմիական և արդյունաբերական թափոններին:

Հիշեցնենք, Բազելյան կոնվենցիային Հայաստանը միացել է 1990-ականների վերջին: