ԵԱՏՄ-ին անդամակցությունը ՀՀ կառավարության առաջնահերթություններից է. Փաշինյան

Եվրասիական տնտեսական միությանը Հայաստանի անդամակցությունը մեր ղեկավարության առաջնահերթություններից մեկն է: Այս մասին Երևանում ընթացող Եվրասիական միջկառավարական խորհրդի նիստին հայտարարեց ՀՀ վարչապետ Նիկոլ Փաշինյանը:

Նրա խոսքով, այսօր Հայաստանում տեղի են ունենում արմատական բարեփոխումներ, որոնք վերաբերում են մեր հասարակության բոլոր ոլորտներին, իսկ դրանց վերջնական նպատակը մրցակցային ու տեխնոլոգիապես զարգացած տնտեսության ստեղծումն է: Փաշինյանը նշեց, որ թավշյա հեղափոխությունից հետո անցած մեկ տարվա ընթացքում հաջողվել է շոշափելի արդյունքներ գրանցել կոռուպցիայի դեմ պայքարում, տնտեսվարող սուբյեկտների համար հավասար դաշտի ստեղծման, դատական իշխանության անկախության և այլ հարցերում, ինչպես նաև հաջողվել է նվազագույնի հասցնել արհեստական մենաշնորհների ու օլիգոպոլիաների գործունեությունը:

«Այսօր Հայաստանում ոչ ոք չի կարող մանիպուլացիա իրականացնել իր քաղաքական ազդեցությամբ ու ազդեցության լծակներով՝ տնտեսական նպատակների հասնելու համար: Սա առողջացրել է տնտեսական ու քաղաքական մթնոլորտը երկրում», - շեշտեց Հայաստանի վարչապետը՝ ընդգծելով, որ Հայաստանն այսօր դինամիկ զարգացող երկիր է, որը քաղաքականապես կայուն է ու կանխատեսելի:  

Այս իմաստով նա կարևորեց Հայաստանի անդամակցությունը ԵԱՏՄ-ին՝ նշելով, որ մեր երկրի ու ԵԱՏՄ անդամ պետությունների միջև արձանագրվում է առևտրաշրջանառության կայուն աճ:

Փաշինյանը նշեց, որ ՀՀ-ից դեպի ԵԱՏՄ երկրներ արտահանման ծավալն ընդհանուր արտահանման մեջ 2018 թվականին կազմել է 28,5 տոկոս՝ աճելով 20 տոկոսով: Իսկ ընդհանուր առմամբ առևտրաշրջանառութունն աճել է ավելի քան 11 տոկոսով:

ՀՀ վարչապետը նաև հավաստիացրեց՝ իր նախագահության շրջանում Հայաստանը ներդնելու է բոլոր ջանքերն ինտեգրացիոն գործընթացների ամրապնդման ու համագործակցության նոր ուղիների ու մեխանիզմների որոնման համար:

«ԵԱՏՄ ինտեգրացիոն առաջնային ուղղություններից մեկը գազի, նավթի ու նավթամթերքի ընդհանուր շուկաների ստեղծումն է, ինչպես նաև ընդհանուր էլեկտրաէներգետիկ շուկայի փուլային ձևավորումը: Մենք անհրաժեշտ ենք համարում ակտիվացնել ջանքերը այնպիսի զգայուն հարցի շուտափույթ լուծման ուղղությամբ, ինչպիսին է էներգակիրների գնագոյացումը՝ ոչ խտրական հիմքով»,- հավելեց Նիկոլ Փաշինյանը: