Զուրաբիշվիլին հաստատել է, որ իր պաշտոնակալման արարողությունը կկայանա Թելավիում

Վրաստանի նախագահ ընտրված Սալոմե Զուրաբիշվիլին հաստատել է, որ իր պաշտոնակալման արարողությունը կկայանա Թելավի քաղաքում, որը գտնվում է Կախեթի տարածաշրջանում:

«Վրացական երազանք-ժողովրդավարական Վրաստան» իշխող կուսակցության աջակցությունը վայելող Զուրաբիշվիլին հաղթել է նախագահական ընտրությունների՝ նոյեմբերի 28-ին կայացած երկրորդ փուլում:

«Ինչպես դուք արդեն գիտեք, երդմնակալությունը կկայանա Թելավիում: Ես ցանկանում էի անձամբ ձեզ ասել այդ մասին: Մենք կհրավիրենք բոլոր նրանց, ովքեր մեզ հետ ունեն դիվանագիտական հարաբերություններ, իսկ նրանք կորոշեն՝ ով կկարողանա գալ»,- Զուրաբիշվիլիի խոսքը մեջբերել է Imedi հեռուստաընկերությունը:

Վրաստանի նորընտիր նախագահի պաշտոնակալման արարողությունը պետք է տեղի ունենա դեկտեմբերի 16-ին: