«Վեոլիա Ջուր» ՓԲԸ-ն տուգանվեց 10 մլն դրամով

ՀՀ հանրային ծառայությունները կարգավորող հանձնաժողովը որոշում է կայացրել տուգանել «Վեոլիա Ջուր» ՓԲԸ-ին: Որոշումն ընդունվել է հանձնաժողովի այսօրվա նիստում:

ՀԾԿՀ-ից հայտնում են, որ Հանձնաժողովը, ջրամատակարարման եւ ջրահեռացման համակարգին նոր միացման կամ միացման փոփոխության գործընթացի իրականացման վերաբերյալ՝ 2017 թվականի 4-րդ եւ 2018 թվականի 1-ին եռամսյակների տեղեկատվությունների մոնիթորինգի, ինչպես նաեւ՝ քաղաքացիների եւ ընկերությունների բողոքների ուսումնասիրության արդյունքում, հանձնաժողովի 2016 թվականի նոյեմբերի 30-ի №378Ն որոշմամբ հաստատված, խմելու ջրի մատակարարման եւ ջրահեռացման (կեղտաջրերի մաքրման) ծառայությունների մատուցման Կանոններով սահմանված առավելագույն ժամկետները խախտելու համար, հաշվի առնելով նաեւ, որ նոր սպառողների միացման գործընթացի խախտումների համար ընկերությունը սույն թվականի ապրիլի 4-ի N109Ա որոշմամբ արդեն իսկ ենթարկվել էր տուգանքի՝ 5 000 000 (հինգ միլիոն) ՀՀ դրամի չափով, որոշեց

«Վեոլիա Ջուր» փակ բաժնետիրական ընկերությանը տուգանել` 10 000 000 (տասը միլիոն) ՀՀ դրամ գումարի չափով: