Նիկոլ Փաշինյանը չի՞ մեկնի Բրյուսել

Իր մասնակցությունը Բրյուսելում հուլիսի 11-12-ը կայանալիք ՆԱՏՕ-ի գագաթաժողովին կախված է հռչակագրի վերջնական տեքստից։ Այս մասին «Առաջին լրատվական»-ի հարցին ի պատասխան ասել է ՀՀ վարչապետ Նիկոլ Փաշինյանը:

Վարչապետը հստակեցրել է, որ եթե հռչակագրում լինեն Հայաստանի համար անընդունելի ձևակերպումներ՝ մասնավորապես ղարաբաղյան հիմնահարցի կարգավորման վերաբերյալ, ինքն այդ գագաթաժողովին չի մասնակցի։

Սա վարչապետ Նիկոլ Փաշինյանի առաջին պաշտոնական այցն է Բրյուսել, որի շրջանակում նախատեսված են հանդիպումներ Եվրամիության ղեկավարության հետ: Ըստ շրջանառվող լուրերի, սակայն, Փաշինյանը չի մեկնելու Բրյուսել, ինչի մասին կհայտարարվի երկուշաբթի օրը՝ հուլիսի 9-ին: