Ստամբուլահայությունը ստորագրահավաք է սկսել ընդդեմ Աթեշյանի

Ստամբուլահայ համայնքը change.org կայքում ստորագրահավաք է սկսել Պոլսո Հայոց պատրիարքի ազատ ընտրության անցկացման պահանջով:

Պահանջագրում նշվում է, որ պահանջում են վերջ տալ պատրիարքական աթոռի փոխանորդի կառավարմանը՝ Արամ արքեպիսկոպոս Աթեշյանի և թափուր գահը հանրային քվեարկության արդյունքում օժտվի հեղինակավոր ու արժանավոր գահակալով՝  ըստ հայ ավանդույթների ու իրավունքների:

«Ի դեմս Կրոնական ժողովի, հոգեւորականներին կհիշեցնենք իրենց ունեցած պատասխանատվությունը հանրության առջեւ։ Հրավիրում ենք հարգել իրենց խոստումը։ Հանրային խաղաղությունը պիտի հաստատվի այն ժամանակ միայն, երբ արդարորեն իրականանա  արդարության եւ իրավունքի հարկը՝ պատրիարքական ընտրությունը։ Համակերպումից, հնազանդությունից բխած լռությունը ո՛չ թե խաղաղություն է, այլ՝ հալածանք»,- ասված է պահանջագրում։

Այս պահի դրությամբ այն արդեն ստորագրել է ավելի քան 500 մարդ:

Հիշեցնենք, ստամբուլահայությունն ընդվզել է թուրք իշխանությունների կողմից արքեպիսկոպոս Աթեշյանին փոխպատրիարք վերանշանակելու անօրինական քայլի դեմ։ Արդյունքում թուրքական իշխանությունները Աթեշյանին վերանշանակեցին փոխպատրիարքի պաշտոնում, իսկ եկեղեցու բոլոր կանոններով ընտրված պատրիարքի տեղապահ արքեպիսկոպոս Բեքչյանին ստիպեցին հրաժարական տալ ու հեռանալ երկրից։

Այնուհետեւ Թուրքիայի խորհրդարանի հայազգի պատգամավոր Կարո Փայլանն Աթեշյանին անվանեց պետության հարկադիր կատարողը, որին հայ համայնքը չի ընդունի։ Պոլսահայ համայնքում ստեղծված իրավիճակի մասին հատուկ հայտարարությամբ մտահոգություն հայտնեց նաեւ Հայաստանյաց առաքելական եկեղեցու Գերագույն հոգեւոր խորհրդի ժողովը։