Ապագա նախագահն ըստ Սերժ Սարգսյանի. արդյոք կարող է Արմեն Սարգսյանը լինել այդ պաշտոնում
Նախօրեին մի խումբ մտավորականների հետ հանդիպմանը ՀՀ նախագահ Սերժ Սարգսյանը ներկայացրել է, թե, ըստ նրա, ի՞նչ չափորոշիչների պետք է համապատասխանի հանրապետության հաջորդ նախագահը:
Ներկայացնելով իր պատկերացումը հանրապետության ապագա նախագահի մասին՝ Սերժ Սարգսյանը նշել է, որ իր կարծիքով խոսքը մի մարդու, մի անհատի մասին է, ով անցած ճանապարհ ունի, ունի ճանաչում և՛ երկրի ներսում, և՛ դրսում, կարող է պատշաճ մակարդակով, ըստ արժանվույն ներկայացնել Հայաստանն արտերկրում, այսինքն՝ կատարել իր ներկայացուցչական ֆունկցիաները և՛ երկրի ներսում, և՛ երկրից դուրս: Ապագա նախագահը, Սերժ Սարգսյանի պատկերացմամբ, պետք է տիրապետի օտար լեզուների և ունենա լայն կապեր թե՛ սփյուռքում, թե՛ Հայաստանում, վայելի հեղինակություն և որ ամենակարևորն է՝ անկողմնակալ մարդ լինի, ով երբեք քաղաքականությամբ չի զբաղվել և կուսակցության անդամ չի եղել:
Նշենք, որ վերջին օրերի ինտրիգը ՀՀ նախագահի թեկնածուի շուրջ է: Հանրապետական կուսակցությունն այս շաբաթ կսկսի քննարկումները այդ հացրցի շուրջ, իսկ մինչ այդ մամուլում մի շարք անուններ են առաջ քաշվում: Դրանք են` արտգործնախարար Էդվարդ Նալբանդյան, Հանրային խորհրդի նախագահ Վազգեն Մանուկյան, անգամ ՀՀ առաջին նախագահ Լևոն Տեր-Պետրոսյան: Նախկինում շրջանառության մեջ դրված Սահմանադրական դատարանի նախագահ Գագիկ Հարությունյանի անունը այս ցանկից դուրս եկավ այն բանից հետո, երբ Հարությունյանն ասաց, որ չի ցանկանում լինել ՀՀ նախագահ:
Եվ, վերջապես, Միացյալ Թագավորությունում ՀՀ դեսպան Արմեն Սարգսյան: Մտավորականության հետ հանդիպմանը հնչեցրած չափորոշիչներին պարոն Սարգսյանը համապատասխանում է ամբողջությամբ` տիրապետում է օտար լեզուների, ընդունելի և ներկայանալի է սփյուռքում, քաղաքականությամբ չի զբաղվել:
Սակայն կարո՞ղ է Արմեն Սարգսյանը դիտվել որպես թեկնածու, հաշվի առնելով Սահմանադրության պահանջը: Հիշեցնենք, Սահմանադրության փոփոխությունների համաձայն, «հանրապետության նախագահ կարող է ընտրվել քառասուն տարին լրացած, վերջին վեց տարում միայն Հայաստանի Հանրապետության քաղաքացի հանդիսացող, վերջին վեց տարում Հայաստանի Հանրապետությունում մշտապես բնակվող, ընտրական իրավունք ունեցող և հայերենին տիրապետող յուրաքանչյուր ոք»։ Համաձայն Արմեն Սարգսյանի կենսագրության, վերջինս 1991 թվականից հետո գրեթե Հայաստանում չի բնակվել` 1991-1995 եղել է ՄԹ-ում Հայաստանի դեսպան, 1991-1999` Եվրոպայի ավագ դեսպան, դեսպան Եվրոպական Միությունում, Բելգիայում, Նիդերլանդներում, Լյուքեմբուրգում և Վատիկանում, 1995-1996-ին ԵՄ-ում ՀՀ Առաքելության ղեկավար: Այնուհետ 1996-1997թթ-ին եղել է ՀՀ վարչապետ, բայց արդեն 1998-1999 վերանշանակվել ՄԹ-ում Հայաստանի դեսպան: Վերջին վերանշանակումը այդ դիվանագիտական աշխատանքին եղել է 2013 թվականին:
