Գերմանիայի ԱԳՆ. Թուրքիան երբևէ չի դառնա ԵՄ անդամ, քանի դեռ այդ երկրի ղեկին Էրդողանն է

Գերմանիայի արտաքին գործերի նախարար Զիգմար Գաբրիելը հայտարարել է, որ Թուրքիան երբևէ չի դառնա Եվրամիության անդամ, քանի դեռ այդ երկրի իշխանության գլխին Ռեջեփ Թայիփ Էրդողանն է, գրում է գերմանական Bild պարբերականը:

Ըստ նրա՝ դա չի նշանակում, որ Եվրոպան չի ցանկանում իր ընտանիք ընդունել Թուրքիային, սակայն Էրդողանի կառավարությունը եվրոպական ընդհանուր արժեքների մասին պատկերացումներին հակառակ ուղով է ընթանում:

Ավելի վաղ Գաբրիելն իր հայտարարություններից մեկում Էրդողանին առաջարկել է հանդես գալ ԵՄ-ին անդամակցության շուրջ բանակցությունները դադարեցնելու նախաձեռնությամբ, քանի որ ստեղծված իրավիճակում քիչ հավանական է, որ դրանք դրական արդյունքի կհանգեցնեն:

Նրա խոսքով՝ Թուրքիան մեծ է և գոյություն կունենա նաև Էրդողանից հետո: «Մենք խնդիր չունենք Թուրքիայի հետ, թուրքերի հետ, մենք խնդիրներ ունենք ներկայիս կառավարության հետ», - ասել է գերմանացի գործիչը: