Կարո Փայլանը դատի է տվել քրիստոնյաներին «գյավուր» անվանած թուրք սյունակագրին
Թուրքիայի ընդդիմադիր Ժողովրդադեմոկրատական կուսակցության անդամ, խորհրդարանի հայազգի պատգամավոր Կարո Փայլանը բողոք է ներկայացրել Թուրքիայի հանրապետական դատախազություն ընդդեմ թուրքական «Յենի Շաֆաք» պարբերականի սյունակագիր Հայրեթթին Քարամանի: Այս մասին, հղում անելով t24.com.tr կայքին, գրում է Tert.am-ը:
Օրեր առաջ Քարամանն իր հերթական հոդվածներից մեկը վերնագրել էր թուրքական «Խոզի կաշվից սփռոց դուրս չի գա, գյավուրից էլ բարեկամ դուրս չի գա» ասացվածքով՝ դրանով վիրավորելով քրիստոնյաներին:
Իր հոդվածում «Յենի Շաֆաք»-ի հոդվածագիրը մեջբերել էր Ղուրանում տեղ գտած հրահանգները ոչ մահմեդական ժողովուրդների հետ փոխհարաբերությունների ու նրանց հետ վարվելու կանոնների մասին:
Փայլանը մեղադրել է թուրք սյունակագրին ժողովրդի մեջ ատելություն սերմանելու, ինչպես նաև հասարակության որոշակի զանգվածի նվաստացնելու մասին հոդվածների համար: