Մենք չունենք այլ ելք, քան անկախության հասնելը. Իրաքյան Քուրդիստանի ղեկավար

Իրաքյան Քուրդիստանի նախագահ Մասուդ Բարզանին հայտարարել է, որ իրաքցի քրդերն այլ ելք չունեն, քան անկախության հասնելը, և կոչ է արել աշխարհի բոլոր քրդերին աջակցել դրան, այս մասին հայտնում է Sputnik-ի թուրքալեզու ծառայությունը:

Ըստ Բարզանիի՝ անկախության հարցով հանրաքվեն ունակ է կանխել տարածաշրջանին պատուհասող նոր արհավիրքն ու նպաստել քուրդ ժողովրդի ուժերի միավորմանը:

«Ես ցանկանում եմ, որ դուք աջակցեք դրան, քանի որ մենք այլ ելք չունենք, քան անկախության հասնելը», - ասել է նա:

Նշենք, որ իրաքցի քրդերը հանրաքվեի կգնան այս տարվա սեպտեմբերի 25-ին: Դրանից հետո նախատեսվում է խորհրդարանական ընտրություններ կազմակերպել նոյեմբերի 6-ին:

Հիշեցնենք, որ օրեր առաջ ԱՄՆ պետքարտուղար Ռեքս Թիլերսոնը Բարզանիին ուղղված հաղորդագրության մեջ պահանջել է հետաձգել հանրաքվեն՝ հաշվի առնելով տարածաշրջանում ստեղծված իրավիճակն ու ահաբեկչության դեմ պայքարի կարևոր նշանակությունը: Դրան ի պատասխան Բարզանիի գրասենյակից հայտարարել են, որ հանրաքվեի օրը կմնա անփոփոխ: