Թրամփի փեսան առաջարկել է ՌԴ դեսպանին Մոսկվայի հետ գաղտնի կա՞պ ստեղծել

ԱՄՆ նախագահ Դոնալդ Թրամփի փեսան ու նրա ավագ խորհրդական Ջարեդ Կուշներն առաջարկել է Միացյլա Նահանգներում ՌԴ դեսպան Սերգեյ Կիսլյակին ստեղծել գաղտնի կապ Ռուսաստանի հետ սիրիական խնդրի կարգավորման համար: Այս մասին գրում է Associated Press գործակալությունը՝ հղում կատարելով իր աղբյուրների վրա:

Ըստ աղբյուրի, գաղտնի կապի նպատակն էր կոնտակտ հաստատել ՌԴ զինվորականների և Թրամփի ազգային անվտանգության հարցերով խորհրդական Մայքլ Ֆլինի միջեւ: Նշվում է, որ կապի այս խողովակը պետք է «հեշտացներ Սիրիայի վերաբերայլ զգայուն հարցերի» քննարկումները: Աղբյուրը, որ ծանոթ է եղել Trump Tower-ում Կիսլյակի ու Կուշների հանդիպումների օրակարգին, պատմել է, որ վերջիվորջո Թրամփի թիմը հասկացավ, որ Մոսկվայի ու Վաշինգտոնի միջեւ հետադարձ կապի խնդիր չի լինի, երբ պետքարտուղար նշանակվի Ռեքս Թիլերսոնը:

Նա նշանակվեց պետքարտուղար այս տարվա փետրվարի 1-ին: Այդ ժամանակ Թրամփի վարչակազմն արդեն որոշել էր ռուսաստանցի գործընկերների հետ կապ պահպանել պաշտոնական խողովակների միջոցով:

Այս հրապարակումն աննկատ չի մնացել Ռուսաստանում: Պետդումայի արտաքին հարցերի հանձնաժողովի նախագահ Լեոնիդ Սլուցկին, մեկնաբանելով տեղեկատվությունը, հայտարարել է, որ Կիսլյակի ու Կուշների միջեւ կոնտակտների մասին հաղորդումները ՌԴ-ի դեմ տեղեկատվական արշավի մի մասն են և «բացարձակ անհեթեթություն» են: