ՌԴ դեսպան. Խաչատուրովը շատ բան կարող է անել ՀԱՊԿ-ի համար

Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Յուրի Խաչատուրովն այդ պաշտոնում կդրսևորի իր լավագույն որակները: Այս մասին Sputnik Արմենիային ասել է Հայաստանում Ռուսաստանի արտակարգ և լիազոր դեսպան Իվան Վոլինկինը։

«Յուրի Գրիգորիևիչ Խաչատուրովին ճանաչում եմ արդեն մի քանի տարի, արժանի մարդ է։ Կարծում եմ, որ որպես ՀԱՊԿ գլխավոր քարտուղար նա կդրսևորի իր բոլոր ունակությունները, որոնք նա արդեն ցուցադրել է Հայաստանի գլխավոր շտաբի պետի պաշտոնում», - ասաց Վոլինկինը։ Նրա խոսքով` Խաչատուրովը շատ բան կարող է անել կազմակերպության համար։

«Յուրի Գրիգորևիչը կդառնա կազմակերպության լոկոմոտիվը», - ասաց Վոլինկինը։ Վոլինկինը նշեց, որ Հայաստանը կազմակերպության ակտիվ անդամ է, պարբերաբար հանդես է գալիս տարբեր նախաձեռնություններով։

Հիշեցնենք, ապրիլի կեսերին ՀԱՊԿ պետությունների ղեկավարների գագաթնաժողովին որոշում կայացվեց Յուրի Խաչատուրովին կազմակերպության գլխավոր քարտուղարի պաշտոնում նշանակելու վերաբերյալ: