Կառավարությունը 5.6 մլրդ դրամ կհատկացնի 61 մանկապարտեզի շինարարությանը

Հայաստանի կառավարությունը շարունակում է նախադպրոցական հաստատությունների ենթակառուցվածքների բարելավման լայնածավալ ծրագիրը՝ 2026 թվականի պետական բյուջեից շուրջ 5.6 միլիարդ դրամ վերաբաշխելով հանրապետության մարզերում 61 մանկապարտեզների կառուցման ու հիմնանորոգման համար: Համապատասխան որոշումն ընդունվել է գործադիրի օգոստոսի 6-ի նիստում։

Ըստ Կրթության, գիտության, մշակույթի և սպորտի նախարար Ժաննա Անդրեասյանի՝ տրամադրված ֆինանսավորման գերակշիռ մասն ուղղվելու է 35 մանկապարտեզների շինարարական աշխատանքներն ավարտին հասցնելուն: Բացի այդ, նախատեսվում է մեկնարկել ևս ութ հաստատության հիմնանորոգում, իսկ 18 արդեն կառուցված կամ նորոգված շենքերում կիրականացվեն լրացուցիչ անհրաժեշտ աշխատանքներ:

Միաժամանակ, ֆինանսական միջոցներ կտրամադրվեն ևս ութ նախադպրոցական հաստատության տեխնիկական վիճակի գնահատման և նախագծանախահաշվային փաստաթղթերի կազմման նպատակով: Որոշումն ընդգրկում է նաև դրամաշնորհային ծրագրի ֆինանսավորում, որն իրականացվում է ճապոնական հիմնադրամի աջակցությամբ և միտված է դպրոցների շենքային պայմանների բարելավմանը:

Նախագծի քննարկման ժամանակ ՀՀ վարչապետ Նիկոլ Փաշինյանն ընդգծել է, որ ծրագրի շրջանակներում պետք է ապահովվի ոչ միայն հիմնական շենքերի վերակառուցումը, այլև հարակից տարածքների և բակերի ամբողջական բարեկարգումը՝ ապահովելով վերջնական ու համապարփակ արդյունք:

Հատկացվող միջոցները կբաշխվեն Արագածոտնի, Արարատի, Արմավիրի, Գեղարքունիքի, Լոռու, Կոտայքի, Շիրակի, Սյունիքի, Վայոց ձորի և Տավուշի մարզերի տասնյակ նախադպրոցական հաստատությունների միջև: Նշվում է, որ նախագծի վերջնական իրագործման համար պահանջվում է ընդհանուր 8.2 միլիարդ դրամ, որից մնացած մասը կհատկացվի ըստ անհրաժեշտության՝ աշխատանքների ընթացքում:

Այս ֆինանսավորմամբ գործադիրն ապահովում է 300 դպրոցի և 500 մանկապարտեզի արդիականացման պետական ծրագրի անխափան իրագործումը։