«Փոքրիկ խմբակը» պետք է հեռանա, 2026-ը վճռորոշ է լինելու. Կարապետյան

2026 թվականի նախաշեմին, որը խոստանում է շրջադարձային լինել Հայաստանի նորագույն պատմության համար, գործարար և բարերար Սամվել Կարապետյանը հանդես է եկել ծրագրային հայտարարությամբ՝ խիստ քննադատության ենթարկելով գործող իշխանություններին և ներկայացնելով երկրի զարգացման իր այլընտրանքային տեսլականը։

Իր ուղերձում նա ընդգծել է, որ գալիք խորհրդարանական ընտրությունները վճռելու են հայոց պետականության ճակատագիրը՝ ժողովրդին կանգնեցնելով ընտրության առաջ՝ շարունակել անկումը, թե՞ սկսել իրական վերածնունդ:

Կարապետյանը փաստել է ներկայիս կառավարման լիակատար ձախողումը՝ իշխանությունը որակելով որպես «փոքրիկ խմբակ»՝ գիտելիք և ռազմավարություն չունեցող ղեկավարի գլխավորությամբ։ Ըստ նրա՝ իրական գործերի փոխարեն հանրությանը կերակրում են «վարդագույն նկարներով» և դատարկ խոստումներով՝ կոչ անելով պահպանել Փաշինյանի իշխանությունը՝ ի հեճուկս աղետալի ձախողումների, պետական պարտքի աճի և հասարակական պառակտման։ Որպես հակակշիռ՝ «Մեր ձևով» շարժման հիմնադիրը ներկայացրել է չորս կետից բաղկացած հստակ ծրագիր՝ հիմնված արդարության և տնտեսական պրագմատիզմի վրա։

Առաջարկվող ծրագրի առանցքը արժանի և պրոֆեսիոնալ կադրերի առաջխաղացումն է, ԱՄԷ-ի օրինակով միջազգային կապերի օգտագործումը՝ երկիրը հարստացնելու համար, և աղքատության լիակատար վերացումը։ Կարապետյանը խոստացել է լուծել քաղաքացիների վարկային ծանրաբեռնվածության խնդիրը և վերանայել արտաքին քաղաքականությունը՝ հրաժարվելով «պրիմիտիվ քեն քշելու» և հակառուսական խարդավանքների քաղաքականությունից՝ հօգուտ հավասարակշռված հարաբերությունների։

Եզրափակելով՝ բարերարը կոչ է արել ազգային համախմբման և իշխանությունների սերմանած ատելության մերժման՝ հանուն անվտանգ և բարեկեցիկ Հայաստանի կառուցման։

Սամվել Կարապետյանը կալանավորվել է 2025 թվականի հունիսին։ Իրավապահ մարմինները նրան մեղադրանք են առաջադրել իշխանությունը զավթելու կոչերի և ֆինանսական չարաշահումների հոդվածներով այն բանից հետո, երբ գործարարը հրապարակայնորեն աջակցեց Հայ Առաքելական Եկեղեցու առաջնորդած ընդդիմադիր շարժմանը։ Կարապետյանի փաստաբանական թիմը պնդում է, որ գործը շինծու է և ունի բացառապես քաղաքական ենթատեքստ։