Փաշինյանը հայտարարում է Ադրբեռանի հետ դեռևս չբացված սահմանի ընթացակարգերի պարզեցման մասին

ՀՀ վարչապետ Նիկոլ Փաշինյանը հայտարարել է, որ Հայաստանը մտադիր է պարզեցնել սահմանային ընթացակարգերը ոչ միայն Ադրբեջանի հետ սահմանին, այլև իր բոլոր սահմանային անցակետերում։ Նա նշել է, որ այս քայլը կնպաստի բիզնես միջավայրի բարելավմանը և կխթանի առևտուրը։

Լրագրողների հետ զրույցում Փաշինյանն ընդգծել է, որ ապագայում կվերանան մաքսային հսկողության այն հնացած մեթոդները, որոնք պահանջում են մարդկանց անձնական ստուգում։ «Մենք կգնանք պարզեցման ճանապարհով ոչ միայն հայ-ադրբեջանական սահմանին, այլև մեր բոլոր սահմանային կետերում, որպեսզի առավելագույնս պարզեցնենք բիզնես միջավայրը՝ արտահանումը, ներմուծումը, տարանցումը», - ասել է նա։

Վարչապետը հիշեցրել է, որ Վաշինգտոնում ստորագրված համատեղ հռչակագիրը հիմնված է հինգ հիմնարար սկզբունքների վրա՝ տարածքային ամբողջականություն, ինքնիշխանություն, իրավասություն, սահմանների անձեռնմխելիություն և փոխադարձություն։ Նա հավելել է, որ այս սկզբունքները համահունչ են իր կողմից առաջ քաշված «Խաղաղության խաչմերուկ» նախագծին։

Ըստ Փաշինյանի՝ ժամանակակից զարգացած երկրներում սահմանային հսկողության համար օգտագործվում են թվային տեխնոլոգիաներ և կենսաչափական անձնագրեր, ինչը թույլ է տալիս հրաժարվել հնացած ընթացակարգերից։ Հայաստանի, ԱՄՆ-ի և Ադրբեջանի ղեկավարները Վաշինգտոնում ստորագրել էին համատեղ հռչակագիր, որը, ի թիվս այլ կետերի, վերահաստատում է երկու երկրների միջև հաղորդակցության բացման կարևորությունը։