Երևանի դատարանում կաշառքի գործով քննչական գործողություններ են իրականացվել

Երևանի ընդհանուր իրավասության դատարանի Շենգավիթի նստավայրում Հակակոռուպցիոն կոմիտեի քննիչները շարունակել են քննչական գործողությունները: Կոմիտեից պատասխանելով մեր հարցմանը՝ հայտնել են, որ վարույթը վերաբերում է կաշառք տալու, ստանալու և կաշառք ստանալուն օժանդակելու դեպքերին:

Ըստ հաղորդագրության, 2025 թվականի ապրիլի 29-ին, նշված քրեական վարույթի շրջանակներում, դատարանում իրականացվել է ապացուցողական գործողություն՝ ՀՀ դատական իշխանության ներկայացուցչի մասնակցությամբ:

Հակակոռուպցիոն կոմիտեն տեղեկացրել է, որ նախաքննությունը շարունակվում է:

Մեզ հայտնի դարձավ, որ վարույթը առնչվում է դատավոր Արտուշ Գաբրիելյանին, սակայն նրա կարգավիճակի վերաբերյալ մանրամասներ չեն հաղորդվում:

Ավելի վաղ հայտնել էինք, որ Հակակոռուպցիոն կոմիտեի քննիչները քննչական գործողություններ են իրականացնում Երևանի ընդհանուր իրավասության դատարանում: