Հայտնի ներդրողը և $15 միլիարդ ակտիվներով հեջ ֆոնդի հիմնադիրը նոր մաքսային սակագների քաղաքականությունը համեմատել է «տնտեսական միջուկային պատերազմի» սկսման հետ, որը սպառնում է աղետալի հետևանքներով համաշխարհային տնտեսության և հատկապես ցածր եկամուտ ունեցող ամերիկացիների համար:
Ամերիկացի միլիարդատեր Բիլ Էքմանը սուր քննադատության է ենթարկել ԱՄՆ նախագահ Դոնալդ Թրամփի վարչակազմի կողմից ներմուծված նոր մաքսատուրքերը՝ նախազգուշացնելով համաշխարհային տնտեսության համար աղետալի հետևանքների մասին: X սոցիալական ցանցում իր հայտարարության մեջ գործարարը նոր սակագները համեմատել է «տնտեսական միջուկային պատերազմի» սկզբի հետ, որը կազդի աշխարհի բոլոր երկրների վրա:
Էքմանի կարծիքով, այս որոշման հետևանքները կործանարար կլինեն. դադարեցվելու են ներդրումները բիզնեսում, սպառողները ստիպված են լինելու կրճատել ծախսերը, իսկ ԱՄՆ-ի հեղինակությունը միջազգային ասպարեզում լրջորեն կտուժի: «Վստահության վերականգնման համար կպահանջվեն տարիներ կամ նույնիսկ տասնամյակներ», - ընդգծել է միլիարդատերը:
Հատուկ ուշադրություն ներդրողը դարձրել է փոքր և միջին բիզնեսի վիճակին, որը, նրա խոսքերով, ավելի շատ կտուժի, քան խոշոր ընկերությունները, քանի որ չի կարողանա դիմակայել ծախսերի հանկարծակի ավելացմանը: «Բիզնեսը վստահության խաղ է: Նախագահը կորցնում է ամբողջ աշխարհի բիզնես առաջնորդների վստահությունը: Հետևանքները մեր երկրի և միլիոնավոր քաղաքացիների համար, ովքեր աջակցել են նախագահին, մասնավորապես ցածր եկամուտ ունեցող սպառողների համար, ովքեր արդեն իսկ հսկայական տնտեսական սթրես են ապրում, ծայրահեղ բացասական կլինեն: Սա այն չէ, ինչի համար մենք քվեարկել ենք», - գրել է Էքմանը:
Չնայած քննադատությանը, Էքմանը համաձայնվել է Թրամփի փաստարկների հետ, որ այլ երկրներ երկար ժամանակ օգտվել են ԱՄՆ-ի հաշվին տնտեսական առավելություններից: Սակայն նա կոչ է արել նախագահին սառեցնել մաքսատուրքերի մասին որոշումը, որոնք պետք է ուժի մեջ մտնեն ապրիլի 9-ին, և դրա փոխարեն բանակցություններ անցկացնել «անարդար ասիմետրիկ մաքսային համաձայնագրերի» կարգավորման և ԱՄՆ-ում նոր ներդրումների ներգրավման համար:
«Հակառակ դեպքում մենք շարժվում ենք դեպի տնտեսական միջուկային ձմեռ, որը մենք ինքներս ենք ստեղծել, և մենք պետք է թաքնվենք: Թող սառնասրտությունը գերակայի», - նախազգուշացրել է միլիարդատերը:
Հարկ է նշել, որ Բիլ Էքմանը, ում կարողությունը Forbes-ը գնահատում է 8,9 միլիարդ դոլար (310-րդ տեղը աշխարհի ամենահարուստ մարդկանց վարկանիշում), երկար ժամանակ աջակցել է Դեմոկրատական կուսակցությանը, սակայն 2024 թվականի ընտրություններից կարճ ժամանակ առաջ հրապարակայնորեն աջակցություն է հայտնել Դոնալդ Թրամփին, չնայած նրան, որ նախկինում պահանջել էր նրա հրաժարականը:
