Առաջին անգամ Ֆիլմարտադրողների ֆեդերացիան Կաննում կունենա տաղավար. հուշագիր է ստորագրվել

«Գագիկ Ծառուկյան» բարեգործական հիմնադրամի և «Ֆիլմարտադրողների համահայկական Ֆեդերացիա» ՀԿ միջև ստորագրվեց համագործակցության հուշագիր։

Հուշագրի նպատակն է աջակցել հայ ռեժիսորների ֆիլմերի վաճառքին և փառատոնային տարածմանը, նոր սկսվող ֆիլմերի զարգացմանը, արտադրության մեջ գտնվող ֆիլմերի համար գործընկերներ գտնելուն, կինոարդյունաբերության մեջ էական դերակատարում ունեցող հայաստանյան և սփյուռքահայ կինոգործիչների միջև կապերի ամրապնդմանը, Հայաստանի գրավիչ իմիջի շեշտակի ավելացմանը՝ քրիստոնեության բնօրրան երկիրը որպես ֆիլմերի նկարահանումների, ճամփորդության և տուրիզմի համար նոր ու զարմանահրաշ տարածք ներկայացնելու եղանակով։

Կինոռեժիսոր Հովհաննես Գալստյանի խոսքով, համագործակցության հուշագրի շրջանակներում իրականացվող առաջին ծրագիրը կհանդիսանա «Գագիկ Ծառուկյան» հիմնադրամի կողմից 2025թ-ի մայիս 13-21-ը Կաննի (Ֆրանսիա) միջազգային կինոփառատոնի շրջանակներում անցկացվող կինոշուկայում «Ֆիլմարտադրողների Համահայկական Ֆեդերացիա» ՀԿ տաղավարի գլխավոր հովանավորչությունը։ Շնորհակալություն հայտնելով «Գագիկ Ծառուկյան» հիմնադրամին, ռեժիսորը շեշտեց՝ առաջին անգամ ֆեդերացիան Կաննում կունենա տաղավար, միանգամից երկուսը, ինչը խոսում է Հայաստանում կինոարտադրության զարգացման առաջին նշույլների մասին.

«Այս համագործակցությունը հուշում է, որ բոլոր շանսերն ունենք հայկական կինոն առաջ տանելու, զարգացնելու: Վստահ եմ, որ արդունքում կստեղծվեն նոր լավ ու որակյալ ֆիլմեր»,- ընդգծեց նա:

Իր հերթին, Գագիկ Ծառուկյանի խոսնակ Իվետա Տոնոյանը նշեց, որ հիմնադրամի համար էլ այս համագործակցությունը խորհրդանշական կարևորություն ունի, հատկապես, որ իր գոյության երեք տասնամյակների ընթացքում բարեգործական հիմնադրամը մշակութային հարյուրավոր ծրագրեր է իրականացրել։

«Կինոյի զարգացմանը միտված այս համագործակցությունը մեզ համար ևս հետաքրքիր փորձառություն է, ինչին վերաբերվում ենք ամենայն պատասխանատվությամբ։ Մշակույթն այն եզակի ոլորտներից մեկն է, որն ամբողջ աշխարհին ներկայանալի է դարձնում մեր պետությունը, իսկ վերջին տարիներին տարբեր ոլորտներում տիրող այս խեղճությունը մեզ համար չէ։ Մենք մշտապես ամբողջ աշխարհին ասելիք ենք ունեցել և ձեռք բերված մեր հաղթանակները հպարտության առիթ են տալիս։ Վստահ են՝ մենք ունենք բոլոր հնարավորություններն աշխարհին լավագույնս ներկայանալու համար»,- նշեց Իվետա Տոնոյանը։