Ավանեսյան. «Հայաստանում ժողովրդավարությունը դառնում է անշրջելի իրականություն»

Հայաստանի առողջապահության նախարար Անահիտ Ավանեսյանը հայտարարել է, որ Գյումրիի ընտրությունների արդյունքները վկայում են այն մասին, որ Հայաստանում ժողովրդավարությունն իսկապես արմատանում և անշրջելի իրողություն է դառնում։ Այս հայտարարությունը նա արել է ապրիլի 3-ին կառավարության նիստից հետո ճեպազրույցի ժամանակ։

«Մենք ավելի շատ ձայն ունենք հավաքած 2021 թվականի համեմատությամբ, բայց այս արդյունքները մեզ չեն գոհացնում։ Վստահաբար, «Քաղաքացիական պայմանագիր» կուսակցությունը, մանրամասն վերլուծելով ընթացքը, արդյունքները և որոշակի հետևություներ անելով, կպատրաստվի հաջորդ ընտրություններին», - նշել է Ավանեսյանը։

Նախարարը նաև անհամաձայնություն է հայտնել այն կարծիքի հետ, թե 2026 թվականին փոխվելու է իշխանությունը։ «Ինձ վստահեցնում է այն, որ մեր Կառավարությունն իրագործում է տված խոստումները և մեր քաղաքացիների կյանքը դեպի բարելավում է տանում։ Միանշանակ, «Քաղաքացիական պայմանագիր» կուսակցությունը հավակնում է 2026 թվականին ևս իշխանության գալ», - ընդգծել է նա։

Ավանեսյանի խոսքով, չնայած Գյումրիում քվեարկության արդյունքները իշխող կուսակցության համար այնքան հաջող չեն եղել, որքան ցանկալի էր, ժողովրդավարական ընտրությունների անցկացման փաստն ինքնին զգալի ձեռքբերում է Հայաստանի քաղաքական համակարգի համար։