Երկրում կադրային ճգնաժամ է. Նիկոլ Փաշինյան

Կառավարության ապրիլի 3-ի նիստում Հայաստանի վարչապետ Նիկոլ Փաշինյանը կտրուկ հայտարարություն է արել՝ ի պատասխան իր կաբինետի կադրային քաղաքականության բազմամյա քննադատության:

«7 տարվա մեջ ով վեր է կենում, առավոտից երեկո ասում է՝ էս կառավարությունը սխալ կադրային քաղաքականություն է վարում։ Հա, սխալ կադրային քաղաքականություն է վարում, որովհետև երկրում կադրային ճգնաժամ է, մարդկային ռեսուրսի ճգնաժամ է», — հայտարարել է Փաշինյանը:

Վարչապետի խոսքով՝ մի երկրում, որտեղ բնակավայրերի 70%-ում մանկապարտեզ չկա, երբ դպրոցների 70%-ը կիսավեր է, անխուսափելիորեն առաջանում է կադրային սով:

Փաշինյանը նշել է բարձրորակ մասնագետների փոքր խմբի գոյությունը, որոնք ստանում են մինչև 10 միլիոն դրամ աշխատավարձ և չեն գնա աշխատելու կառավարությունում․ «Դեռ քիչ է՝ 400-500 հազար դրամ ստանան, ամեն ստացած կոպեկի հետ էլ անեծքը հետը տանեն տուն՝ պարգևավճար, պարգևավճար»։

Կառավարության ղեկավարը նաև ընդունել է, որ եթե իր կաբինետի անդամների շրջանում թեստավորում անցկացվի, կպարզվի, որ նրանք էլ չեն համապատասխանում չափորոշիչներին։ «Նույնն էլ մեզնից առաջների հետ էր լինելու», — ավելացրել է նա:

Փաշինյանի կարծիքով, գոյություն ունեն բացառություններ, որոնք միայն հաստատում են երկրում կադրային դեֆիցիտի մասին ընդհանուր կանոնը: