Սրբուհի Գալյանը «Արմավիր» ՔԿՀ-ում ծանոթացել է ազատազրկված անձանց պահման պայմաններին

ՀՀ արդարադատության նախարար Սրբուհի Գալյանը՝ նախարարի տեղակալ Գևորգ Քոչարյանի և Քրեակատարողական ծառայության պետի առաջին տեղակալ Սահակ Գրիգորյանի ուղեկցությամբ այցելել է «Արմավիր» քրեակատարողական հիմնարկ: Այդ մասին հայտնում են արդարադատության նախարարությունից:

Նախարարն այնտեղ հետևել է քրեակատարողական հիմնարկի ինքնագործ մշակութային միավորման անդամ՝ ազատազրկված անձանց նախաձեռնությամբ և մասնակցությամբ բեմադրված «Խնամախոս» ներկայացմանը:

Բեմադրության ավարտին տեղի է ունեցել ազատազրկված, ինքնագործ մշակութային միավորման նախագահ Մխիթար Մոս-Մուշեղյանի հեղինակած «Խնամախոս» գրքի շնորհանդեսը:

Սրբուհի Գալյանը կարևորել է ազատազրկված անձանց վերասոցիալականացմանն ուղղված ծրագրերի իրականացումը՝ նաև թատերական բեմադրությունների միջոցով։

Արդարադատության նախարարը շրջայց է կատարել «Արմավիր» քրեակատարողական հիմնարկում, ծանոթացել ազատազրկված և կալանավորված անձանց պահման պայմաններին։