Հայաստանը ՄԱԿ-ում նշանակում է ռազմական կցորդ

Կառավարության որոշումը ՄԱԿ-ի կենտրոնակայանում պաշտպանության հարցերով ներկայացուցչի նշանակման վերաբերյալ նպատակաուղղված է ռազմաքաղաքական համագործակցության զարգացմանը և միջազգային ասպարեզում հանրապետության դիրքերի ամրապնդմանը։

Հայաստանի կառավարության մարտի 20-ի նիստում ընդունվել է Միավորված Ազգերի Կազմակերպությունում հանրապետության ներկայացուցչության կազմում պաշտպանության հարցերով ռազմական կցորդի պաշտոն ներդնելու վերաբերյալ որոշման նախագիծը։ Նախաձեռնությունը մշակվել է Հայաստանի պաշտպանության նախարարության կողմից և ուղղված է ռազմական ոլորտում արտաքին քաղաքական փոխգործակցության արդյունավետության էական բարձրացմանը։

Ընդունված փաստաթղթի տեքստի համաձայն, «ՄԱԿ-ում ռազմական կցորդի պաշտոնի ներդրումը հնարավորություն կստեղծի Հայաստանի Հանրապետության պաշտպանության նախարարության համար արդյունավետ աշխատել պաշտպանության հարցերով ներկայացուցչի միջոցով, կնպաստի ինստիտուցիոնալ կապերի հետագա ամրապնդմանը և զարգացմանը, ինչպես նաև ռազմական և ռազմաքաղաքական փոխգործակցության հնարավորությունների ընդլայնմանը»։

Որոշման նախագծում նաև նշվում է, որ ՄԱԿ-ում Հայաստանի ռազմական կցորդը կիրականացնի միջազգային կազմակերպության հետ ռազմական և ռազմաքաղաքական համագործակցության համակարգումը, կամրապնդի երկկողմ փոխգործակցության մակարդակը, ինչպես նաև կներկայացնի համագործակցության հեռանկարային զարգացման վերաբերյալ առաջարկություններ։