Եթե ես ինքնաթիռում լինեմ և հարց լինի ՀՀ գոյության, խփեք այդ ինքնաթիռը. Ալեն Սիմոնյան

ԱԺ նախագահ Ալեն Սիմոնյանին լրագրողներն այսօր հիշեցրեցին իր այն հայտարարությունը, թե ինքը համարում է, որ այդ գերիները չկան (խոսքը Բաքվում ապօրինի պահվող գերիների մասին է):

Սիմոնյանը լրագրողներին մեղադրեց նրանում, թե այդ հայտարարությունը կոնտեքստից կտրած են ներկայացնում  և ստացվում է, որ ինքն ասել է, թե Հայաստանի համար այդ գերիները ոչնչություն են, իրենք գոյություն չունեն:

"Դա այդպես չէ: Երբ ես բանակում ծառայել եմ, ես  կանգնել եմ պոստի, իմանալով, որ ես կարող է չվերադառնամ: Ես պատասխանատու եմ ոչ միայն անհատապես ամեն ՀՀ քաղաքացու և զինվորի համար, այլ գլոբալ առումով Հայաստանի Հանրապետության համար: Եվ պնդում եմ այն, ինչ ասել եմ. ՀՀ զինվորականները այն բանի համար են, որ պետք եղած ժամանակ իրենց կյանքով և ազատությունով պաշտպանեն Հայաստանի շահերը, և եթե հարց կանգնի՝ ես կընտրեմ Հայաստանի Հանրապետությունը",- ասաց նա:

Սիմոնյանի խոսքով՝ Հայաստանի շահը ավելի բարձր է, քան անհատական իր շահը: Անգամ օրինակ բերեց.

"Եթե ես ինքնաթիռում լինեմ և հարց լինի Հայաստանի Հանրապետության գոյության, խփեք այդ ինքնաթիռը՝ անգամ վայրկյան չմտածելով: Բոլորը պետք է այդպես մտածեն",-ասաց նա:

Անդրադառնալով ՀՀ նախկին արտգործնախարար Վարդան Ոսկանյանի քննադատություններին, ով մտահոգ է գերիների վերադարձի հարցով, Ալեն Սիմոնյանը հայտարարեց.

«Ինքը վաղուց թոշակի է գնացել, թող հանգիստ իր թոշակով զբաղվի»,-ասաց նա:

Ապա մեղադրեց՝ Վարդան Օսկանյանը 10 տարի հնարավորություն ուներ իր փառահեղ մտքերը և դիվանագիտությունը գործի դնելու, սակայն արդյունքում Արցախը դուրս է թողել բանակցություններից Ռոբերտ Քոչարյանի հետ և հարցը չի լուծել: