Հայաստանի կառավարությունը քայլ է կատարել երկրում կրիպտոարժութային շուկան կարգավորելու ուղղությամբ: Նախարարների կաբինետի փետրվարի 27-ի նիստում ֆինանսների նախարար Վահե Հովհաննիսյանը ներկայացրեց «Կրիպտոակտիվների մասին» օրենքի և հարակից մի շարք օրենքներում փոփոխություններ և լրացումներ կատարելու մասին օրենքների նախագծերի փաթեթը, որը ստացավ կառավարության հավանությունը: Սա առաջին լուրջ փորձն է կարգավորելու ոլորտը, որը վերջին տարիներին ակտիվորեն զարգացել է, բայց միաժամանակ լուրջ ռիսկեր է ստեղծել երկրի ֆինանսական համակարգի համար:
Նախարարի խոսքով, կրիպտոակտիվների ոլորտում ակտիվության աճի հետ մեկտեղ առաջանում են մի շարք ռիսկեր, որոնք հիմնականում կապված են հաճախորդների շահերի պաշտպանության բավարար մեխանիզմների բացակայության և կրիպտոարժույթների ու դրանց հիմքում ընկած տեխնոլոգիաները փողերի լվացման և ահաբեկչության ֆինանսավորման համար օգտագործելու վտանգի հետ: «Կրիպտոակտիվների շրջանառության ծավալների շարունակական աճը կարող է ստեղծել ֆինանսական կայունության ռիսկեր», - ընդգծեց Հովհաննիսյանը:
Նա նշեց, որ նշված ռիսկերին պատշաճ չարձագանքելը նույնպես բացասաբար է ազդում ոլորտի զարգացման վրա: «Մասնավորապես, հաճախորդների շահերի անբավարար պաշտպանվածությունը թույլ չի տալիս ներգրավել մեծ թվով օգտատերերի և նրանց հասանելի դարձնել բարձրորակ ծառայություններ, ինչպես նաև հնարավորություն տալ մասնակցել տարաբնույթ ծրագրերի ֆինանսավորմանը նոր թողարկված կրիպտոակտիվներում ներդրումներ կատարելով: Փողերի լվացման և ահաբեկչության ֆինանսավորման ռիսկերը սահմանափակում են կրիպտոէկոհամակարգի և ֆինանսական համակարգի պատշաճ ինտեգրման և փոխշահավետ համագործակցության հնարավորությունները»:
Օրենքի նախագծի հիմնական նպատակները նախարարը նշեց Հայաստանի կրիպտոակտիվների շուկայում հաճախորդների և կրիպտոակտիվներ ձեռքբերողների իրավունքների և օրինական շահերի պաշտպանությունը, կրիպտոակտիվների շուկայի արդար և թափանցիկ գործունեության ապահովումը, ինչպես նաև այս ոլորտում համակարգային ռիսկերի նվազեցումը: Օրենսդրական փոփոխությունների արդյունքում Կենտրոնական բանկը հնարավորություն կստանա տեղեկատվություն ստանալ ոլորտում իրականացվող գործունեության վերաբերյալ և պատշաճ կերպով արձագանքել փողերի լվացման, ահաբեկչության ֆինանսավորման և այլ ռիսկերին:
Վարչապետ Նիկոլ Փաշինյանը, մեկնաբանելով նախաձեռնությունը, ընդունեց, որ սա կրիպտոարժույթների ոլորտը կարգավորելու առաջին փորձն է: «Այս կարգավորումը չի լինելու կատարյալ, և մենք այսքան տարի այս կարգավորմանը չենք գնացել՝ մտածելով՝ բա որ կարգավորումը չլինի կատարյալ, փորձել ենք մի քիչ էլ դառնա կատարյալ: Էլի չի դարձել կատարյալ ու չի դառնալու կատարյալ, բայց մենք պետք է մտնենք՝ ոլորտը կարգավորելու»: Կառավարության ղեկավարը ընդգծեց, որ պետական կառավարման համակարգը հընթացս պետք է գիտելիք ձեռք բերի կրիպտոարժույթի մասին:
«Այո՛, կլինեն քննադատություններ, որ այս նախագիծը, օրենքը կատարյալ չէ, բայց այս նախագծի գոյությունն ավելի կատարյալ է, քան դրա բացակայությունը: Հետևաբար սա շատ կարևոր քայլ է, որը պետք է համարձակորեն և վճռական կերպով անել այն տրամաբանությամբ, որ մենք պետք է շարունակենք այս ուղղությամբ մեր աշխատանքները», - ասաց վարչապետը և ընդգծեց. «Պետք է արձանագրել, որ ուշացել ենք, բայց լավ է ուշ, քան երբեք»:
Փոխվարչապետ Մհեր Գրիգորյանը պաշտպանեց նախաձեռնությունը՝ նշելով, որ այս քայլին չգնալը ենթադրում է մեծ խոցելիություն և՛ ֆիսկալ համակարգի համար, և՛ արժութային կարգավորման, և՛ վճարահաշվարկային համակարգի համար: Նա կարծիք հայտնեց, որ մեկնարկը ճիշտ է, և այժմ անհրաժեշտ է իրավիճակը մոնիթորինգի տակ պահել, որպեսզի խնդիրների բացահայտման դեպքում կատարվեն լրացումներ և բարելավումներ՝ ստեղծելու այնպիսի կարգավորում, որը չի խոչընդոտի ոլորտի զարգացմանը, բայց միաժամանակ չի վնասի գործող կարգավորման համակարգերի աշխատանքը:
