Հստակեցվում են գիտաշխատողների ատեստավորման չափանիշները. կառավարության որոշում

Կրթության, գիտության, մշակույթի և սպորտի նախարարությունն առաջարկում է փոփոխություններ կատարել 2023-ի վերջին ընդունված գիտական կադրերի ատեստավորման կարգում։ Ինչպես հունվարի 30-ի կառավարության նիստում նշեց նախարար Ժաննա Անդրեասյանը, ճշգրտումները միտված են հստակեցնելու մի շարք հասկացություններ և արդյունավետության ցուցանիշներ գիտաշխատողների տարբեր կատեգորիաների համար՝ նախքան 2026-ին նախատեսված ատեստավորումը։

Նախարարի խոսքով, գիտական ոլորտում հրապարակումների վերլուծությունը բացահայտել է դրույթներ, որոնք թույլ են տալիս երկակի մեկնաբանություն և հնարավորություն են տալիս խուսափել գիտական արդյունքների ավելի լայն միջազգայնացումից և որակյալ գրախոսությունից։ Նոր փոփոխությունները հստակեցնում են միջազգային գիտական շտեմարաններում հրապարակումներին ներկայացվող պահանջները։

Փոփոխությունների երկրորդ փաթեթը վերաբերում է համարժեքության համակարգին. գիտական հոդվածները չեն կարող ամբողջությամբ փոխարինվել մենագրություններով, հոդվածների հրապարակումը մասամբ կմնա պարտադիր։ Կհստակեցվեն նաև ոչ լրիվ ծանրաբեռնվածությամբ աշխատողներին ներկայացվող պահանջները, իսկ հայագիտության և հումանիտար գիտությունների մասնագիտությունների համար ստորին պաշտոնների պահանջները առաջիկա ատեստավորման համար կկազմեն 5-ամյա պահանջների 2/5-ը։

Նախարարը նշեց, որ 2025 թվականի հունվարի 1-ից գիտական աշխատավարձերը նորմավորվել են ըստ գործող ատեստավորման կարգի, ինչի արդյունքում դրանք առնվազն կրկնապատկվել են 2021-ի համեմատ, իսկ որոշ պաշտոնների համար նույնիսկ քառապատկվել են։ Այս քաղաքականության արդյունքներն արդեն տեսանելի են. 2023-ին գրանցվել է հայ գիտնականների հրապարակումների պատմական առավելագույն ցուցանիշը հեղինակավոր միջազգային պարբերականներում։