Սկանդալ խորհրդարանում. ընդդիմադիր պատգամավորը քննադատվել է Արցախի քարտեզի ցուցադրման համար

Հունվարի 20-ին ՀՀ խորհրդարանում հերթական քաղաքական սկանդալ բորբոքվեց, երբ «Պատիվ ունեմ» խմբակցության պատգամավոր Աննա Մկրտչյանը ցուցադրեց Հայաստանի քարտեզը՝ Լեռնային Ղարաբաղով և հարակից շրջաններով, ինչը առաջացրեց ԱԺ փոխնախագահ Ռուբեն Ռուբինյանի կոշտ արձագանքը։

Ազգային ժողովում իր ելույթի ժամանակ պատգամավոր Աննա Մկրտչյանն ամբիոնին ամրացրեց մի քարտեզ, որտեղ կապույտով նշված էին Լեռնային Ղարաբաղի տարածքը և յոթ հարակից շրջանները՝ հայտարարելով, որ «սա մեր հայրենիքն է, որը դավաճան իշխանությունները հանձնեցին»։ Բացի այդ, նա նիստերի դահլիճում վերջերս տեղադրված Հայաստանի քարտեզի մակետը անվանեց «մետաղի ջարդոն»։

Ի պատասխան՝ ԱԺ փոխնախագահ Ռուբեն Ռուբինյանը կոշտ քննադատության ենթարկեց Մկրտչյանի հայտարարությունները։ Նա հիշեցրեց, որ պատգամավորի քաղաքական առաջնորդը՝ նախկին նախագահ Սերժ Սարգսյանը, իր նախագահության 10 տարիների ընթացքում բանակցել է տարածքների հնարավոր հանձնման շուրջ և հրապարակայնորեն հայտարարել է 5+2 շրջաններից Հայաստանի զորքերի դուրսբերման պատրաստակամության մասին։

«Տիկին Մկրտչյան, ձեր քաղաքական ղեկավարը 10 տարի նախագահ է եղել։ Ստացվում է՝ նա այդ ողջ ընթացքում բանակցում էր հայրենիքը հանձնելո՞ւ շուրջ։ Չէ՞ որ Սերժ Սարգսյանը հրապարակային իր ելույթներում, հարցազրույցներում նշել է Հայաստանի պատրաստակամության մասին՝ դուրս գալու 5+2 շրջաններից։ Դուք դա չե՞ք հերքի։ Այսինքն՝ նա պատրաստ էր հեռանալ հայրենիքից, ուզում էր հանձնել հայրենիքը. ուրեմն ո՞վ է այստեղ դավաճանը», - հայտարարեց Ռուբինյանը։

Միջադեպից հետո խորհրդարանի անվտանգության ծառայության աշխատակիցները հեռացրին Մկրտչյանի կողմից ամբիոնին ամրացված քարտեզը։