ՌԴ Դաշնային խորհուրդը հանդես է գալիս Ադրբեջանի և ԵԱՏՄ-ի համագործակցության խորացման օգտին

ՌԴ Դաշնային խորհրդի միջազգային հարցերով հանձնաժողովի նախագահ Գրիգորի Կարասինը Ռուսաստանում Ադրբեջանի դեսպան Ռահման Մուստաֆաևի հետ հանդիպման ընթացքում հայտարարել է Եվրասիական տնտեսական միության (ԵԱՏՄ) հետ Ադրբեջանի մերձեցմանն աջակցելու մասին։

Ռուսական խորհրդարանի վերին պալատի մամուլի ծառայության հաղորդմամբ՝ նման համագործակցությունը նպաստում է անվտանգության ամրապնդմանը, ինչպես նաև տարածաշրջանում տնտեսական և տրանսպորտային կապերի զարգացմանը։ Դաշնային խորհուրդը ողջունում է նաև Բաքվի մտադրությունը՝ ընդլայնել փոխգործակցությունը այնպիսի միջազգային միավորումների հետ, ինչպիսիք են ԲՐԻԿՍ-ը և ՇՀԿ-ը։

«Մեր համագործակցության հիմքում ընկած է փոխադարձ վստահությունը», - ընդգծել է Կարասինը՝ նշելով, որ ռուս-ադրբեջանական հարաբերությունները ներկայումս դրական դինամիկա են ցուցաբերում։

Հանդիպման ընթացքում կողմերը քննարկել են երկկողմ տնտեսական համագործակցության հարցեր, Ադրբեջանում Ռուսաստանի գլխավոր հյուպատոսության բացման հեռանկարները, ինչպես նաև տարածաշրջանային արդի խնդիրներ, այդ թվում՝ Անդրկովկասում և ուկրաինական ճգնաժամի շուրջ իրավիճակը։