Գերիների հարցով Բաքվի հետ հանդիպում է նախատեսվում առաջիկայում. ԱԱԾ տնօրեն

Հայաստանն ու Ադրբեջանը նախատեսում են առաջիկայում հանդիպում անցկացնել գերիների ու անհետ կորածների հարցով։ Ազգային ժողովի բակում լրագրողների հետ զրույցում տեղեկությունը հայտնեց ՀՀ ազգային անվտանգության ծառայության տնօրեն Արմեն Աբազյանը, գրում է Sputnik-ը:

«Գերիների և անհետ կորածների հարցով հանդիպում դեռ չի եղել, հնարավոր է` առաջիկայում լինի հանձնաժողովների կազմով»,– ասաց նա։

Աբազյանը նշեց, որ դեռ չի որոշվել, թե հանդիպումը որտեղ կլինի, և հորդորեց չշտապել արդյունքների հարցում։

Հիշեցնենք` Բաքուն պաշտոնապես հաստատում է 23 հայի գերեվարման փաստը, որոնցից 17-ն այնտեղ են հայտնվել Լեռնային Ղարաբաղի դեմ Ադրբեջանի սեպտեմբերյան ագրեսիայից հետո: Նրանց թվում են Արցախի ռազմաքաղաքական ղեկավարության ներկայացուցիչները։