Հայաստանի կառավարությունը կաջակցի առաջնահերթ ոլորտներում ներդրումային ծրագրերին

Հայաստանում երկու ընկերություն կստանան ներմուծման մաքսատուրքից ազատման արտոնություններ՝ ներդրումային ծրագրերի շրջանակներում: "Չապ քեմիքլ"-ը նախատեսում է ընդլայնել օճառի արտադրությունը, իսկ "Սմարթ սիստեմ"-ը կզարգացնի էլեկտրամոբիլների ենթակառուցվածքը:

Հոկտեմբերի 17-ին Հայաստանի կառավարությունը որոշում է ընդունել "Չապ քեմիքլ" և "Սմարթ սիստեմ" ընկերություններին ներմուծման մաքսատուրքից ազատման արտոնություններ տրամադրելու մասին՝ գերակա ոլորտներում ներդրումային ծրագրերի իրականացման շրջանակներում:

"Չապ քեմիքլ" ընկերությունը նախատեսում է ներմուծվող հումքն օգտագործել օճառի արտադրության համար: Ծրագիրը նախատեսում է 20 մլն դրամի ներդրում հումքի ձեռքբերման և 70 մլն դրամի ներդրում արտադրամասի շինարարական աշխատանքների իրականացման համար:

Ներկայումս ընկերությունում ստեղծվել է 10 աշխատատեղ՝ 97 հազար դրամ միջին ամսական աշխատավարձով: Արտոնություն ստանալու համար ներկայացված ապրանքների արժեքը կազմում է 20 մլն դրամ: Մաքսատուրքից ազատման արտոնությունը գնահատվում է 1,3 մլն դրամ:

"Սմարթ սիստեմ" ընկերությունը մտադիր է զարգացնել և ընդլայնել Հայաստանում էլեկտրական մեքենաների միջոցով փոխադրումների հնարավորությունները՝ իրականացնելով դրանց տեխնիկական սպասարկում և նորոգում: Ծրագրի շրջանակներում նախատեսվում է 72 մլն դրամի ներդրում սարքավորումների ձեռքբերման համար:

Ներկայումս ընկերությունում աշխատում է 18 մարդ՝ 130 հազար դրամ միջին ամսական աշխատավարձով: Մինչև 2025 թ. նախատեսվում է աշխատատեղերի թիվը հասցնել 23-ի՝ 140 հազար դրամ միջին աշխատավարձով: Արտոնություն ստանալու համար ներկայացված ապրանքների արժեքը կազմում է 22,6 մլն դրամ: Մաքսատուրքից ազատման արտոնությունը գնահատվում է 1,2 մլն դրամ: