Առաջին անգամ Հայաստանի քաղաքական գործիչների պատվիրակությունն այցելել է Դոնբաս

Առաջին անգամ Հայաստանի քաղաքական գործիչների պատվիրակությունն այցելել է Դոնեցկի Ժողովրդական Հանրապետություն։ Այս մասին հայտնում է @donbassr տելեգրամյան ալիքը։

Նրանք Մակեևկայում «Մայր Հայաստան» դաշինքի անունից տեղի հայ համայնքին և հայկական եղեկեցուն նվեր են փոխանցել՝ Սուրբ Մեսրոպ Մաշտոցի պատկերով նկար։

«Սա հայոց այբուբենի հիմնադիրն է ու սրբագույն անձնավորություն»,-ասել է հայաստանյան պատվիրակության ղեկավար, «Մայր Հայաստան» դաշինքի առաջնորդ Անդրանիկ Թևանյանը։

Նա նաև իր խոսքում նշել է, որ ցանկանում են հասկանալ, թե ինչպես է հայկական ստորաբաժանումն ապրում ու մարտնչում Դոնբասում։

«Մեր առաքելությունը մարդասիրական է, տեղեկատվական և ճանաչողական։ Մենք ցանկանում ենք ի ցույց դնել, որ կողմ ենք հայ-ռուսական հարաբերությունների ամրապնդմանը»,-նշել է Թևանյանը։

Տելեգրամյան ալիքը նշում է, որ Հյուսիսային ռազմական օկրուգում գործում է «ԱրԲաթ» հատուկ նշանակության գումարտակը, որը համալրված է Դոնբասի տարածքում ապրող հայերով և ժամանած կամավորներով։

Հայ քաղաքական գործիչների այցը Դոնբաս պետք է ցույց տա, որ յուրաքանչյուր ժողովուրդ ունի ինքնորոշման իրավունք, կարծում է «Մայր Հայաստան» դաշինքի առաջնորդ Անդրանիկ Թևանյանը։

«Պետք է որքան հնարավոր է շուտ ավարտել պատերազմը, որպեսզի խաղաղություն լինի։ Մենք գիտենք, թե ինչ է պատերազմը։ Կարծում ենք, որ Դոնբասի ժողովուրդն ունի իր իրավունքները, որոնք պետք է հաշվի առնել։ Մեզ համար երկակի ստանդարտներն անընդունելի են»,-ընդգծել է նա։