Ծառուկյանի կարևոր մեսսիջը՝ պետական հանցավոր անկյալության ֆոնին

«Կոչ եմ անում՝ գործադրել ձեր հեղինակությունը՝ Բաքվի բանտերից ազատ արձակելու ՀՀ քաղաքացիներին». Գագիկ Ծառուկյանը Փարիզի Ամառային օլիմպիադայիայի ֆոնին նման կոչով է դիմել ՄՕԿ նախագահին:

Այս ուղերձի քաղաքական, տեղեկատվական, բարոյական բաղադրիչները չափազանց կարևոր են:

Օլիմպիադան ոչ միայն ինքնին խաղաղության ուղերձ է, այլ նաև իր շուրջ ստեղծել է տեղեկատվական, դիվանագիտական կարևոր միջավայր, որտեղ ցանկացած երկիր ձգտում է ներկայացնել իր առաջնահերթություններից բխող խնդիր:

Ծառուկյանը հենց այս համատեքստում է բարձրացրել պատանդառված մեր հայրենակիցներին ազատ արձակելու հարցը: Իհարկե, ՀԱՕԿ նախագահի ուղերձը կարող էր խիստ արդյունավետ ընթացք ստանալ, եթե այս խնդրում չլիներ Հայաստանի իշխանության հանցավոր անկյալությունը, գերիներին ազատ արձակելու շուրջ համազգային միասնություն ձևավորելու փոխարեն՝ նրանցից շատերին թիրախավորելու նենգությունը:

Հուսամ՝ Ծառուկյանի այս նախաձեռնությունը դրական առումով վարակիչ կլինի. յուրաքանչյուրս պարտավոր ենք մեր միջազգային գործընկերների առջև դնել հումանիտար այս խնդիրը լուծելու անհրաժեշտության պատասխանատվությունը:

Քաղաքագետ Սուրեն Սուրենյանց