Վայոց Ձորի մարզի Արենի համայնքի "Ռուսաց լեզվի և մշակույթի" կենտրոնը գործում է ընդամենը մեկ տարի, սակայն արդեն մեծ տարածում է գտել տեղի դպրոցականների շրջանում: "ՄԻՐ" (“МИР”) հիմնադրամի (Միջազգային զարգացման ինստիտուտ) և Ռուսաստանի Հաղորդակցությունների զարգացման ազգային հետազոտական ինստիտուտի կողմից ստեղծված այս կենտրոնը 6-17 տարեկան երեխաների համար բացառիկ հնարավորություն է ընձեռում սովորելու ռուսաց լեզու, մշակույթ և հայ-ռուսական բարեկամության պատմություն:
Հունիսի 3-ին լրացավ Արենի համայնքում "Ռուսաց լեզվի և մշակույթի" կենտրոնի հիմնադրման մեկ տարին և այդ առիթով կազմակերպվեց միջոցառում: Հանդիպմանը մասնակցել են նաև «Հաղորդակցությունների զարգացման միջազգային ինստիտուտ» հումանիտար հիմնադրամի տնօրեն Գագիկ Ալոյանը, հիմնադրամի ծրագրերի ղեկավար Լուիզա Գումրոյանը, Հայաստանում «Ռոսսոտրուդնիչեստվոյի» ներկայացուցչության ղեկավար Վադիմ Ֆեֆիլովը, Արենի համայնքի ղեկավար Հուսիկ Սահակյանը, Արենի համայնքի ղեկավարի տեղակալ Մհեր Ասատրյանը:
Ռուսաց լեզվի և մշակույթի ուսումնասիրության մեջ իրենց հաջողություններն ու նվաճումները ցուցադրելու համար աշակերտները պատրաստել էին ստեղծագործական միջոցառում, որի ծրագրում ընդգրկված էին հանրաճանաչ երգեր՝ նվիրված Հայրենական Մեծ պատերազմին և ռուս հայտնի բանաստեղծների բանաստեղծությունները: Երեխաներին հուզմունքը հաղթահարելուն օգնել է "Ռուսաց լեզվի և մշակույթի" կենտրոնում տիրող ջերմ մթնոլորտը: Ուսուցչի աջակցությունը լավ խթան հանդիսացավ այն երեխաների համար, ովքեր նախատեսում են շարունակել բարելավել ռուսաց լեզվի իրենց մակարդակը: Շնորհանդեսի միջոցով կենտրոնի սաները պատմեցին տարվա ընթացքում իրենց մասնակցությամբ իրականացված բազմաթիվ միջոցառումների մասին: Կենտրոնի սաները ապահովեցին տոնական տրամադրություն և հեքիաթի զգացողություն:
"Հարգելի հյուրեր, ցանկանում եմ շնորհավորել բոլորին "Ռուսաց լեզվի և մշակույթի" կենտրոնի ծննդյան օրվա կապակցությամբ: Մենք բոլորս տեսնում ենք, որ կենտրոնը լցված է կենսական էներգիայով։ Երեխաները հաճույքով են գալիս այստեղ, և այն դարձել է նրանց կյանքի մի մասը", – ասաց Գագիկ Ալոյանը՝ հատուկ շնորհակալություն հայտնելով ուսուցչուհի Ծաղիկ Մանուկյանին և նրան հանձնեց շնորհակալագիր տարվա ընթացքում կատարած աշխատանքի համար: Հումանիտար հիմնադրամի տնօրենը շնորհակալություն հայտնեց և շնորհակալագրեր հանձնեց նաև Արենի համայնքի ղեկավարին և նրա տեղակալին ՝ կենտրոնի բացման աշխատանքների կազմակերպմանն աջակցելու համար:
"Չնայած այն հանգամանքին, որ "Ռուսաց լեզվի և մշակույթի" կենտրոնը զբաղեցնում է ընդամենը 20 քմ տարածք, բայց այստեղ յուրաքանչյուր մետրը արդյունավետ է օգտագործվում: Այսօր մենք տեսանք, որ երեխաներին այստեղ հետաքրքիր է, և դա ամենակարևորն է: Եթե երեխաները ձանձրանային, ապա մենք դա անմիջապես կնկատեինք: Երեխաների մոտ կա հետաքրքրություն, կա անկաշկանդություն և, իհարկե, կա սեր", - ասել է "Ռոսսոտրուդնիչեստվո" - ի ղեկավար Վադիմ Ֆեֆիլովը՝ ընդգծելով, որ հասցրել է երեխաների հետ ընկերանալ միջոցառման մեկնարկից առաջ։ Ֆեֆիլովը հաջողություն է մաղթել "Ռուսաց լեզվի և մշակույթի" կենտրոնին Հայաստանում "Ռոսսոտրուդնիչեստվո" - ի, ԱՊՀ գործերով դաշնային գործակալության և Ռուսաստանի Դաշնության դեսպանատան կողմից:
"Այս կենտրոնը մեր համայնքում գործում է արդեն մեկ տարի։ Կենտրոնը բացելիս մենք հաշվի ենք առել, որ ռուսերենը մեզ համար գրեթե հավասար է մայրենի լեզվին, քանի որ Ռուսաստանը նախ մեզ համար շատ կարևոր եղբայրական պետություն է։ Այսօր Ռուսաստանում ապրում է ավելի քան երեք միլիոն հայ մեր հայրենակիցներից", - ասել է Արենի համայնքի ղեկավարը։
"Ռուսաց լեզվի և մշակույթի" կենտրոնում երեխաները սովորում են պատմություն, Ռուսաստանի մշակույթ, ռուս գրականություն: Ռուսաց լեզվի ուսուցումն ուղեկցվում է ինչպես մշակութային միջոցառումներով, այնպես էլ հենց երեխաների նախաձեռնություններով: Այսինքն՝ նրանք ընտրում են թեման, քննարկումներ են անցկացնում և դրա վերաբերյալ ներկայացում պատրաստում։ Գրեթե ամեն շաբաթ մենք ինչ-որ միջոցառում ենք անցկացնում ՝ նվիրված նշանակալի օրվան", - նկատեց հիմնադրամի ծրագրերի ղեկավար Լուիզա Գումրոյանը։
"Մեր կենտրոնում այս պահին սովորում է 45 աշակերտ։ Ես մեծ հաճույքով եմ աշխատում երեխաների հետ, և նրանք ուրախությամբ են գալիս դասի։ Մեր կենտրոնում սեր է տիրում, ես սիրում եմ իմ աշխատանքը և իմ աշակերտներին: Սա մեր առաջին քայլերն են, մենք շարունակելու ենք աշխատել և երեխաներին ռուսաց լեզու և մշակույթ կսովորեցնենք", - միջոցառման ավարտին ասաց ուսուցչուհի Ծաղիկ Մանուկյանը ՝ ընդգծելով, որ կենտրոնի սաների մեծ մասն իր սաներն են Արենի համայնքի դպրոցում:
Հայաստանում գործում է երեք Կենտրոն, որոնք ուղղված են ռուսաց լեզվի և մշակույթի ուսումնասիրությանը։ Բացի Վայոց Ձորի մարզի Արենի համայնքում "Ռուսաց լեզվի և մշակույթի" կենտրոնից, գործում են նաև կենտրոններ Գեղարքունիքի մարզի Սևան և Գավառ քաղաքներում: Յուրաքանչյուր կենտրոնն ունի իր ուրույն անվանումը. Սևանի կենտրոնը կոչվում է "Մշակույթ", Գավառի՝ "Գրականություն", իսկ Արենիի կենտրոնը՝ "Տիեզերք": Ընդհանուր առմամբ, ներկայումս ավելի քան 150 աշակերտներ սովորում են երեք կենտրոններում:
