Նախկին նախագահներից հանդիպել եմ Սերժ Սարգսյանի հետ. Բագրատ Սրբազան

Այս րոպեներին Բագրատ Սրբազանի առաջնորդությամբ երթը Սուրբ Աննա եկեղեցուց շարժվում է դեպի Մաշտոցի պողոտա:

Թե ուր՝ Բագրատ Սրբազանը չի բացահայտում, ուղղակի ասաց, որ գնում են հաշվետվություն պահանջելու: Կառույցը, թե որտեղ պետք է պահանջները ներկայացվեն, երեկվանից նրա կողմից գաղտնի է պահվում:

"Այսօր՝ երեկվա տրամաբանությամբ, շատ կարևոր տեղ ենք գնալու։ Սայաթ-Նովա, Մաշտոցի պողոտաներով գնալու ենք այդ կարևոր տեղը։ Բայց դեռ չեմ ասում, թե որտեղ",- ասաց նա:

Անդրադառնալով իշխանությունների կողմից անընդհատ կրկնվող նարատիվին, թե շարժումը մարում է, Սրբազանն ասաց.

"Երբ Աստված մարդուն ուզում է պատժել, խելքը վերցնում է։ Այս իշխանությունները ո՛չ կենսագրություն ունեն, ո՛չ խելք։ Իրենք ինչո՞ւ են անհանգստանում՝ շարժումը մարում է, թե՝ ոչ, իրենց ի՞նչ գործն է",- նշեց նա:

Ինչ վերաբերում է հարցին, թե նախկին նախագահներից ո՞ւմ հետ է հանդիպել, Բագրատ Սրբազանն ասաց՝ միայն Սերժ Սարգսյանի հետ:

"Մյուսների հետ առիթ չի եղել: Իրենցից ցանկություն չի եղել հանդիպելու, ես էլ չեմ հանդիպել",- հավելեց նա: