Հայկական կողմն ունի փորձագիտական օժանդակության կարիք CEPA-ի արդյունավետ կիրարկման հարցում

Ազգային ժողովի եվրոպական ինտեգրման հարցերի մշտական հանձնաժողովի նախագահ Արման Եղոյանը, փոխնախագահ Մերի Գալստյանը եւ արտաքին հարաբերությունների մշտական հանձնաժողովի անդամ Հռիփսիմե Գրիգորյանը մայիսի 30-ին հանդիպել են Միջազգային իրավական համագործակցության կենտրոնի (CILC) ծրագրի ղեկավար Հանս վան դեն Բերգի հետ:

Ողջունելով հյուրին` հայ խորհրդարանականները կարեւորել են Նիդերլանդների կառավարության կողմից ֆինանսավորվող կենտրոնի գործունեությունը` ուղղված մեր երկրում բարեփոխումների իրականացման հարցում խորհրդատվական աջակցության տրամադրմանը:

Կողմերը քննարկել են կառույցի հետ խորհրդարանի եւ, մասնավորապես, Եվրոպական ինտեգրման հարցերի մշտական հանձնաժողովի հնարավոր համագործակցությանը վերաբերող հարցեր:

Արման Եղոյանն ընդգծել է, որ, մասնավորապես, ՀՀ-ԵՄ Համապարփակ եւ ընդլայնված գործընկերության համաձայնագրի (CEPA) արդյունավետ կիրարկման հարցում հայկական կողմն ունի մասնագիտական եւ փորձագիտական օժանդակության կարիք: