Ձնահյուսի հետևանքով զինծառայողի մահվան դեպքով քրեական վարույթ է նախաձեռնվել

Ձնահյուսի հետևանքով զինծառայողի մահվան դեպքով քրեական վարույթ է նախաձեռնվել, հաղորդում է Քննչական կոմիտեն։

Քրեական վարույթը նախաձեռնվել է զինվորական պաշտոնեական անփութություն հոդվածով։

Քննչականը նշում է, որ դեպքը տեղի է ունեցել հունվարի 13-ին։ ժամը 12:30-ի սահմաններում, ժամկետային զինծառայող Բ․ Մ․-ն, մշտական տեղակայման վայր տեղափոխվելու նպատակով, դուրս է եկել մարտական դիրքից և շարժվել դեպի հարակից դիրք: Սակայն ժամը 14:30-ից հետո, եղանակային վատթար պայմաններում, զինծառայողը կորել է համածառայակիցների տեսադաշտից:

Կազմվել է քննչական խումբ։ Որոնողական աշխատանքների արդյունքում, հունվարի 14-ին մարտական դիրքի հարակից ձորում` ձյան տակ, հայտնաբերվել է Բ․Մ․-ի դին։ Կատարվել է դեպքի վայրի զննություն, նշանակվել է դիակի դատաբժշկական փորձաքննություն։

«Ձեռնարկվում են անհրաժեշտ և անհետաձգելի քննչական և վարութային այլ գործողություններ՝ դեպքի հանգամանքները լիարժեք պարզելու նպատակով», - ասված է հաղորդագրությունում։