Ֆրանսիայի վարչապետ Էլիզաբեթ Բորնը հրաժարական է տվել

Ֆրանսիայի վարչապետ Էլիզաբեթ Բորնը հրաժարական է տվել։ Այս մասին գրում է ТАСС-ը՝ հղում անելով հանրապետության նախագահ Էմանուել Մակրոնի X սոցիալական ցանցում (նախկին Twitter) գրառմանը։

Պետության ղեկավարը, որը բավարարել է Բորնի հրաժարականի խնդրանքը, շնորհակալություն է հայտնել նրան «նվիրվածության և վճռականության համար»։

Ինչպես նշվել է Ելիսեյան պալատում, Բորնը կաբինետի այլ անդամների հետ կշարունակի պաշտոնավարել մինչև նոր կառավարության ձևավորումը:

Իր հրաժարականի նամակում Բորնը հանդես է եկել ծրագրված բարեփոխումները շարունակելու օգտին։

Ավելի վաղ BFMTV հեռուստաալիքը Բորնի ամենահավանական իրավահաջորդն էր անվանել 34-ամյա կրթության նախարար Գաբրիել Աթտալին։ Այս տեղեկատվության պաշտոնական հաստատում դեռևս չկա։

Բորնը Ֆրանսիայի նախարարների կաբինետը գլխավորում է 2022 թվականի մայիսից։