Աբխազիայի հայերն ունեն այն ամենը, ինչ Փաշինյանը չկարողացավ երաշխավորել ԼՂ հայերին. Բժանիա

Աբխազիայի նախագահ Ասլան Բժանիան Վրաստանի տարածքային ամբողջականությանն աջակցելու մասին Նիկոլ Փաշինյանի հայտարարությունն անվանել է հակասող Աբխազիայի ինքնիշխանության փաստին։

«Հայաստանի վարչապետն իր վերջին հայտարարության մեջ միանշանակ պաշտպանել է Վրաստանի միասնությունը, ինքնիշխանությունը, տարածքային ամբողջականությունը, անկախությունն ու ժողովրդավարությունը, ինչը էապես հակասում է Աբխազիայի Հանրապետության ինքնիշխանության փաստին»,- ասված է նախագահի մեկնաբանության մեջ։

Նա հիշեցրել է Փաշինյանին, որ Աբխազիայում հարգում են հայ ժողովրդին, որի մի մասն անցյալի ողբերգական իրադարձություններից իր փրկությունն է գտել Աբխազիայում: 

«Աբխազիայի հայերն ունեն այն ամենը, ինչ Փաշինյանը չկարողացավ երաշխավորել Ղարաբաղի հայերին, ովքեր իր վարած քաղաքականության արդյունքում բախվեցին պետականության փլուզման և հայրենի հողից զանգվածային արտաքսվելու ողբերգությանը», - ընդգծեց նա։

Ըստ Բժանիայի՝ Փաշինյանի քաղաքականության հետևանքը եղել է հենց Հայաստանի տարածքային ամբողջականության խախտումը։