ՊՆ-ն՝ ՀՀ կողմից Ուկրաինային հրթիռներ փոխանցելու մասին

Մի քանի օր է, ինչ մի շարք ԶԼՄ-ներ, այդ թվում և ադրբեջանական, շրջանառում են տեղեկություններ այն մասին, թե Հայաստանն առաջիկայում Ուկրաինային կփոխանցի հրթիռներ:

Հաշվի առնելով վերջին շրջանում հայ-ռուսական հարաբերություններում առկա լարվածությունը, այս լուրը, հասկանալի պատճառներով, բավականին մեծ աղմուկ է բարձրացրել Հայաստանի, նաև Ռուսաստանի լրատվական դաշտում: 

Արդյո՞ք նման ծրագրեր կան. այս հարցը  VERELQ-ն ուղղեց ՀՀ պաշտպանության նախարարության խոսնակ Արամ Թորոսյանին: Վերջինիս խոսքով՝ ՊՆ համապատասխան ստորաբաժանումը մշտադիտարկում է ոլորտին առնչվող մամուլի հրապարակումները և մեկնաբանում կամ դրանց արձագանքում է ըստ անհրաժեշտության ու նպատակահարմարության.

«Տվյալ տեղեկությունը չի համապատասխանում իրականությանը և հայաստանյան ԶԼՄ գործընկերներին կոչ ենք անում օտարերկրյա քարոզչական աղբյուրների՝ լրատվադաշտ նետած կեղծ թեզերը չշրջանառել»,- շեշտեց ՊՆ ներկայացուցիչը։