«Հանրային ձայնի» հետ առեւտրի մեջ չենք մտել. Ավինյան

Մենք առհասարակ նմանատիպ առեւտուրների մեջ չենք մտել եւ չենք պատրաստվում մտնել:

Այս մասին այսօր՝ հոկտեմբերի 13-ին, Երեւանի քաղաքապետի երդմնակալության արարողությունից հետո լրագրողների հետ զրույցում նշեց նորընտիր քաղաքապետ Տիգրան Ավինյանը՝ անդրադառնալով դիտարկմանը, որ երկար ժամանակ խոսվում էր այն մասին, թե ի՞նչ է խոստացել ՔՊ-ն «Հանրային ձայն» կուսակցությանը, որը մասնակցեց Երեւանի ավագանու անդրանիկ նիստին եւ իր ներկայությամբ ապահովեց քվորում, եւ երեկ հյտնի դարձավ, որ այդ կուսակցության նխագահ Արտակ Գալստյանի կինը կալանքից ազատ է արձակվել:

«Այն հարցերը, որոնք վերաբերում են քրեական դատավարություններին, քրեական հետապնդման մեջ գտնվող անձանց, մենք դա չենք կարող առհասարակ առեւտրի առարկ դարձնել, որովհետեւ այդ դաշտ չենք էլ մտնում: Այն, ինչ տեղի է ունենում դատական, իրավապահ համակարգում, տեղի է ունենում անկախ այն պրոցեսներից, որոնք տեղի են ունենում քաղաքական դաշտում եւ ավագանու նիստերին: Կարծում եմ՝ ավագանու նիստերին իրենց մասնակցել-չմասնակցելու հետ կապված տարբեր ուժեր իրենց դիրքորոշումները հայտնել են հանրայնորեն: Այսինքն մենք այդտեղ ոչ ներազդել ենք, ոչ առեւտուր ենք արել որեւէ մեկի հետ: Մենք հատուկ շեշտել ենք, որ կան ուժերի տեսակ, որոնց հետ որեւէ գաղափար չենք կիսում եւ իրենց հետ նույնիսկ քննարկելու բան էլ չունենք»,-ասաց նա: