The Strategist. ԱՄՆ–ի ազդեցությունը թուլանում է, ՌԴ–ինը`ուժեղանում

ԱՄՆ-ն այլեւս չի կարող անտեսել աշխարհում ուժերի հավասարակշռության առումով տեղի ունեցող փոփոխությունները։ Առայժմ Ամերիկան մնում է ռազմական ու տնտեսական տեսակետից ուժեղագույն երկիր, սակայն ներկա ամերիկյան վերնախավի քաղաքականությունից զանգվածային հիասթափության ու դժհոգության տագնապահարույց նշանները, որոնք արտացոլվեցին նաեւ նախագահական ընտրությունների արդյունքների վրա, արդեն հնարավոր չէ անտեսել, գրում է The Strategist պարբերականը։

Ըստ հոդվածագրի՝ ԵՄ-ն ու ՆԱՏՕ-ն ժամանակակից աշխարհակարգի երկու հենասյուներն են, սակայն Դոնալդ Թրամփի ընտրվելուց հետո երկու կառույցներն էլ լրջագույն մարտահրավերների առաջ են կանգնելու։ Մոսկվայի հետ Վաշինգթոնի հնարավոր մերձեցումը մտավախություններ է առաջացնում Բալթյան երկրներում ու Բալկաններում, նաեւ տագնապ՝ ՆԱՏՕ—ի ղեկավարությունում։ Ընթացիկ քաղաքական իրավիճակը, ամենայն հավանականությամբ, Ռուսաստանին թույլ կտա ամրապնդել դիրքերը Եվրոպայում։ Չինաստանն ու Իրանը, ըստ The Strategist–ի, նույնպես կընդլայնեն իրենց ազդեցության ոլորտները Հարավ-արեւելյան Ասիայում ու Մերձավոր արեւելքում, մինչդեռ այդ տարածաշրջաններում ամերիկյան ազդեցությունը, հակառակը, կթուլանա։

Թրամփի նախընտրական հռետորաբանությունը, մասնավորապես մուսուլմանների մուտքը երկիր սահմանափակելու խոստումները, նվազեցրել են Մերձավոր արեւելքում ԱՄՆ-ի կողմնակիցների թիվը։ Հետագայում բացառված չէ ԱՄՆ հարաբերությունների վատացում ամբողջ իսլամական աշխարհի հետ։
Ասիայում նույնպես Վաշինգթոնի դիրքերն այնքան ուժեղ չեն, որքան առաջ։ Թրամփի ծրագրերը ՝ ստիպել, որ Հարավային Կորեան ու Ճապոնիան վճարեն իրենց տարածքում ամերիկյան զորքերի տեղակայման համար, կարող է սառեցնել Սպիտակ տան ու նրա ասիական գլխավոր գործընկերների հարաբերությունները, ինչից կարող են օգտվել Հյուսիսային Կորեան ու Չինաստանը՝ ընդլայնելով իրենց ազդեցությունը։ Իսկ եթե Թրամփը, իր խոստումի համաձայն, հրաժարվի Տրանսխաղաղօվկիանոսյան գործընկերությունից ու «առեւտրային պատերազմ» սկսի Չինաստանի դեմ՝ ապա տարածաշրջանում ԱՄՆ դիրքերը ավելի կվատանան, գրում է պարբերականը։