Նախագահը ներկայացրել է ԱԱԽ նորանշանակ քարտուղարին

Նախագահ Սերժ Սարգսյանն այսօր Ազգային անվտանգության խորհրդի քարտուղարության անձնակազմին է ներկայացրել խորհրդի նորանշանակ քարտուղար Յուրի Խաչատուրովին:

Նախագահի պաշտոնական կայքէջի փոխանցմամբ, նախագահը շնորհակալություն է հայտնել խորհրդի նախկին քարտուղար Արմեն Գևորգյանին՝ այդ պաշտոնում գործունեության կարճ ժամանակահատվածում իրականացրած աշխատանքի համար և իր ու հանդիպման մասնակիցների կողմից հաջողություն մաղթել նրան` Հայաստանի նախագահի աշխատակազմի ղեկավարի պարտականությունների կատարման գործում:

Նորանշանակ խորհրդի քարտուղար Յուրի Խաչատուրովին Սերժ Սարգսյանը շնորհավորել է և վստահություն հայտնել, որ նոր աշխատանքում նա կհամատեղի զինվորականի ու արդեն քաղաքական գործչի իր պարտականությունները՝ հանդիպման մասնակիցների հետ ձեռնամուխ լինելով Ազգային անվտանգության խորհրդի աշխատանքները կազմակերպելուն, քարտուղարության աշխատակազմն ամբողջությամբ ձևավորելուն և երկրի առջև ծառացած խնդիրների լուծմանն ակտիվ մասնակցելուն:

Արմեն Գևորգյանը և Յուրի Խաչատուրովը վստահեցրել են նախագահին, որ իրենց գործունեության ընթացքում նախագահի աշխատակազմը և ԱԱԽ քարտուղարությունը լիարժեքորեն կկատարեն իրենց վրա դրված պարտականությունները՝ նպաստելով Հայաստանի Հանրապետության անվտանգության մակարդակի ավելի բարձրացմանը: