Դատական իշխանությունը կայացնելու հարցում անմնացորդ ջանքեր կգործադրեմ. Թումանյանց
Ընտրվելու դեպքում անկախ եւ հանրային վստահությունը վայելող դատական իշխանությունը կայացնելու հարցում անմնացորդ ջանքեր կգործադրեմ. ԱԺ հոկտեմբերի 6-ի նիստում ԲԴԽ անդամի ընտրության հարցը քննարկելիս վստահեցրել է այդ պաշտոնում առաջադրված թեկնածու Երանուհի Թումանյանցը:
«Ազգային ժողովի կանոնակարգ» սահմանադրական օրենքի 144-րդ հոդվածի 2-րդ մասի համաձայն՝ Ազգային ժողովի «Քաղաքացիական պայմանագիր» խմբակցությունը Բարձրագույն դատական խորհրդի անդամի պաշտոնում թեկնածու է առաջադրել Երանուհի Թումանյանցին: Հարցը քննարկվել է «Ազգային ժողովի կանոնակարգ» սահմանադրական օրենքի 135-րդ հոդվածի սահմանած կարգով:
Թեկնածուի կենսագրական տվյալները, մասնագիտական որակներն ու աշխատանքային գործունեությունը ներկայացրել է «Քաղաքացիական պայմանագիր» խմբակցության անդամ Վլադիմիր Վարդանյանը:
Երանուհի Թումանյանցի գնահատմամբ՝ մեր պետության կայուն զարգացման ապագան պետք է մեծապես պայմանավորել երկրի իրավական անվտանգությունն ապահովելուն ուղղված գործիքակազմերի կիրառմամբ: Այս համատեքստում նա անդրադարձել է շուրջ 300 դատավորների արդյունավետ գործունեությանը: Իրավական անվտանգության ապահովման համար թեկնածուն կարեւորել է պատասխանատու եւ արժանապատիվ դատավորների գործունեությունը, որոնք կունենան արդարության նկատմամբ վստահություն ներշնչող մասնագիտական եւ մարդկային որակներ:
Որպես ոլորտում կարեւոր առաջընթաց՝ Երանուհի Թումանյանցը նշել է, որ 2021 թ. միջազգային գործընկերների զեկույցներում Արեւելյան գործընկեր երկրների շարքում անկախ դատական իշխանության ամրապնդման ուղղությամբ կատարված աշխատանքների արդյունքում Հայաստանը գրավել է առաջին հորիզոնականը:
Պատգամավոր Զարուհի Բաթոյանը հարցուպատասխանի ընթացքում կարծիք է հայտնել, որ օրենսդրությամբ հստակ ձեւակերպված չէ «հանրային շահ» հասկացությունը: Նա փորձել է հասկանալ՝ ոլորտի խնդիրները օրենսդրությա՞մբ են պայմանավորված, թե՞ դատական համակարգով: Երանուհի Թումանյանցը պարզաբանել է, որ չկա «հանրային շահ» կոնկրետ հասկացություն: Ըստ նրա՝ հանրային շահին առնչվող հարաբերությունները պետք է կարգավորվեն անհատական մակարդակում, պետք է քննարկվի յուրաքանչյուր դեպք: «Սա է միջազգային լավագույն փորձը, սա է ասում նաեւ ՄԻԵԴ-ը՝ հստակեցնելով, որ յուրաքանչյուր դեպք առանձին քննարկման ենթակա է»,-ասել է թեկնածուն:
Պատգամավոր Կնյազ Հասանովի հարցը վերաբերել է դատավորների քանակի պակասին, մի շարք դատական գործերի ձգձգմանը: Երանուհի Թումանյանցն ընդգծել է, որ ԲԴԽ անդամ ընտրվելու դեպքում իր լիազորությունների շրջանակն այլ է եւ ողջամիտ ժամկետների պահպանման հարցում անմիջական ազդեցություն ունենալ հնարավոր չէ: Նրա խոսքով՝ պետք է հասկանալ ողջամիտ ժամկետների պահպանման օբյեկտիվ եւ սուբյեկտիվ պատճառները. եթե դրանք օբյեկտիվ են, ապա լուծումներ պետք է գտնվեն, իսկ եթե ոչ՝ պատասխանատվության միջոցներ պետք է կիրառվեն:
