Ադրբեջանը հրաժարվել է Սահակաշվիլիին արտահանձնել Վրաստանին
Վրաստանի գլխավոր դատախազությունը ապրիլի 28-ին դիմել է Ադրբեջանին Վրաստանի նախկին նախագահ Միխեիլ Սահակաշվիլիին ձերբակալելու և արտահանձնելու պահանջով: Ուկրաինայի նախագահ Պյոտր Պորոշենկոյի արտահաստիքային խորհրդական համարվող Սահակաշվիլին Բաքու է ժամանել Բաց հասարակությունների 3-րդ գլոբալ համաժողովին մասնակցելու համար, փոխանցում է Black Sea Press կայքը:
Վրաստանի գլխավոր դատախաղազության հասարակայնության հետ կապերի վարչության պետի տեղակալ Նատիա Սուխիաշվիլին հայտարարել է, որ իրենց կառույցը նախօրեին դիմել է ադրբեջանական կողմին Միխեիլ Սահալաշվիլիին ձերբակալելու և հայրենիք արտահանձնելու պահանջով: Վրացական կողմը մինչև այժմ չի ստացել Ադրբեջանի պաշտոնական պատասխանը:
2014թ.-ին Վրաստանի դատախազությունը հեռակա կարգով Սահակաշվիլիին մեղադրանք է առաջադրել մի քանի քրեական գործերի շրջանակներում: Նրան մեղադրում են սեփական կարիքների համար մոտ 8.8 միլիոն լարի պետական միջոցները վատնելու, 2007թ.-ի նոյեմբերի 7-ի հանրահավաքը ցրելու ժամանակ պաշտոնական լիազորությունները գերազանցելու, պատգամավոր Վալերի Գերաշվիլիին ծեծելու և Վրաստանի միացյալ բանկի աշխատակից Սանդրո Գիրգվլիանիին սպանության մեջ՝ 2006թ.-ին:
Սահակաշվիլին լքել է Վրաստանի տարածքը 2013թ.-ի նոյեմբերին, երբ տեղի էր ունենում նոր նախագահ Գեորգի Մարգվելաշվիլիի երդմնակալությունը և այդ օրվանից չի վերադառնում հայրենիք:
Նախկին նախագահի նկատմամբ ներպետական հետախուզում է հայտարարվել և սկսվել են միջազգային հետախուզում հայտարարելու գործընթացները: Նա հանդիսանում է նախագահ Պյոտր Պորոշենկոյի արտահաստիքային խորհրդականը, ինչպես նաև Ուկրաինայի նախագահին կից բարեփոխումների հանձնաժողովի ղեկավարն է:
Բաքվի արձագանքն իրեն երկար սպասել չտվեց: Խորհրդարանի պատգամավոր Ռասիմ Մուսաբեկովը հայտարարել է, որ Ադրբեջանը չի արտահանձնելու Սահակաշվիլիին:
Մուսաբեկովի խոսքով, հենց Սահակաշվիլու օրոք իրականացվել են այնպիսի ռազմավարական ծրագրեր, ինչպիսիք են Բաքու-Թբիլիսի-Ջեյհան նավթամուղը, Բաքու-Էրզրում գազամուղը, սկսվել է Բաքու-Թբիլիսի-Կարս երկաթգծի շինարարությունը: «Ընդունելով Բաքվում Վրաստանի նախկին նախագահ Միխեիլ Սահակաշվիլիին՝ Ադրբեջանը ցույց է տալիս, որ չի մոռանում և չի շրջվում ընկերներից՝ քաղաքական շահերից ելնելով: Դա շատ լավ նշան է ոչ միայն նախկին, այլ նաև օտարերկրյա գործող քաղաքական գործիչների համար», - նշել է Մուսաբեկովը:
