Ավարտվում է Հայաստանի և Ադրբեջանի միջև ավտոմոբիլային երթուղու համաձայնեցումը. Լավրով

Փոխվարչապետների եռակողմ աշխատանքային խումբն ավարտում է Հայաստանի եւ Ադրբեջանի միջեւ ավտոմոբիլային երթուղու համաձայնեցումը:

Այս մասին հայտարարել է Ռուսաստանի արտգործնախարար Սերգեյ Լավրովը՝ իր հայ գործընկեր Արարատ Միրզոյանի հետ հունիսի 9-ին Երևանում կայացած համատեղ մամուլի ասուլիսի ժամանակ։

"Երկաթուղային երթուղին համաձայնեցված է։ Այժմ ավարտվում է ավտոմոբիլային երթուղու համաձայնեցումը և ավարտվում է այն ռեժիմի համաձայնեցումը, որը կհաստատվի։

Այն պարզեցված կլինի, բայց այն հաստատ հենվելու է հայկական տարածքների ինքնիշխանության ճանաչման վրա, և այստեղ ոչ մի երկիմաստություն չի կարող լինել։

Դրանք բաներ են, որոնք կապված են երկար տարիներ ենթակառուցվածք ստեղծելու հետ, եւ այստեղ պետք է ամեն ինչ կշռադատել եւ ուսից չկտրել", - ասել է Լավրովը։

Հիշեցնենք, որ Երեւանն ու Բաքուն Մոսկվայի միջնորդությամբ բարձրացնում են բոլոր կոմունիկացիաների ապաշրջափակման հարցը, որոնք գործել են դեռեւս խորհրդային ժամանակաշրջանում: Տրանսպորտային հաղորդակցությունների ապաշրջափակումը նախատեսվում է Հայաստանի, Ռուսաստանի եւ Ադրբեջանի ղեկավարների կողմից 2020 թվականի նոյեմբերի 10-ին ստորագրված համաձայնագրի համաձայն: