Ռուսաստանը չի ընդունի ԵՄ-ին որպես միջնորդ Ուկրաինայի հետ բանակցություններում. Բորել

Եվրամիությունը չի կարող միջնորդ դառնալ Ռուսաստանի և Ուկրաինայի միջև բանակցություններում: Նման կարծիք է հայտնել ԵՄ արտաքին քաղաքականության և անվտանգության հարցերով գերագույն հանձնակատար Ժոզեպ Բորելը, փոխանցում է ՏԱՍՍ-ը։

«Ոչ մենք: Ռուսները դա չեն ընդունի, ինչպես մենք չենք ընդունի Ռուսաստանին որպես միջնորդ»,- ասել է նա երեքշաբթի երեկոյան գերմանական Frankfurter Allgemeine Zeitung թերթին տված հարցազրույցում։

Միաժամանակ Բորելը հավելել է, որ «Չինաստանը նույնպես հարմար միջնորդ չէ, քանի որ թեքվում է դեպի Ռուսաստան»։ «Թուրքիան այնտեղ շատ լավ աշխատանք է կատարում, երկու կողմերի հետ էլ լավ հարաբերություններ ունի»,- ընդգծել է եվրոպական դիվանագիտության ղեկավարը։

«Ամենալավը, իհարկե, կլինի ՄԱԿ-ը»,- հայտարարել է Բորելը, հավելելով, որ բանակցությունների արդյունքը պետք է որոշեն միայն Ուկրաինան, Ռուսաստանը և միջնորդը։ Միաժամանակ, ինքը՝ քաղաքական գործիչը, չի մեկնաբանել հնարավոր արդյունքները։ «Ես չգիտեմ, դա կախված կլինի նրանից, թե կողմերից յուրաքանչյուրը որքան ուժեղ կլինի»,- ասաց նա։

Միաժամանակ Բորելը պնդել է, որ «անհրաժեշտ է բանակցային սեղանի շուրջ նստել ուժի դիրքերից, և այժմ խնդիրն ուկրաինացիներին այս դիրքում դնելն է»։ «Մենք այս հարցը կքննարկենք նաև հինգշաբթի օրը Գերմանիայի գլխավորած «Մեծ յոթնյակի» ԱԳ նախարարների հանդիպման շրջանակում: Հանդիպումը տեղի կունենա մայիսի 12-14-ը Վանգելս կոմունայում (Շլեզվիգ-Հոլշտեյն դաշնային նահանգ), որը գտնվում է Բալթիկ ծովում:

Բորելը հավելել է, որ Եվրամիությունը կշարունակի զենք մատակարարել Ուկրաինային, ինչպես նաև կձգտի թուլացնել ռուսական տնտեսությունը և Ռուսաստանի Դաշնության միջազգային մեկուսացումը։ «Բայց մենք չենք ցանկանում կռվել Ռուսաստանի դեմ»,- ասել է նա։

Անդրադառնալով Ռուսաստանից գազի մատակարարումների վրա հնարավոր էմբարգոյի սահմանմանը, քաղաքական գործիչը նշեց, որ «գազը ռազմավարական արտադրանք է, քանի որ այն ոչ միայն էներգիայի աղբյուր է, այլ նաև նավթաքիմիական արդյունաբերության հումք»։ «Եվ այն չի կարող փոխարինվել: Այժմ մենք պետք է նոր մատակարարներ գտնենք»,- ասել է Բորելը:

Եզրափակելով՝ նա նշեց, որ հեղուկ բնական գազի ընդունման տերմինալների բացակայությունը սխալ է, որը պետք է ճանաչվի և շտկվի։