Հայաստանում գործող ընտրողների նույնականացման համակարգը չի բացառում կրկնակի քվեարկության հնարավորությունը։ Այս մասին այսօր՝ մարտի 30-ին, ԿԸՀ գործունեության հաշվետվության քննարկումներին ասաց «Հայաստան» խմբակցության անդամ Արթուր Ղազինյանը։
Նրա խոսքով, ընտրողների նույնականացման համակարգն ի սկզբանե ներդրվել է կրկնակի քվեարկությունը բացառելու եւ այսպես կոչված «կարուսել»-ը կիրառելու նպատակով։ Սակայն, ինչպես պարզվում է, ընտրողների տվյալների շտեմարանները տրամադրվում են հատուկ տարածքային տեղամասերի համար, իրականում ՏԻՄ-երը չունեն միասնական տվյալների բազա:
«Ըստ ներկայացված տեղեկատվության՝ օգտագործվող համակարգն, ըստ էության, չի հայտնաբերելու կրկնակի քվեարկության դեպքեր։ Ինչո՞վ է պայմանավորված այն, որ տվյալների բազան ամբողջությամբ ինտեգրված չէ, ի՞նչ տեխնիկական պատճառներ են առաջացել, և արդյոք դրանք կարող են վերացվել մինչև խորհրդարանական ընտրությունները»,- ԿԸՀ ղեկավարին հարցրեց պատգամավորը։
ԿԸՀ նախագահ Տիգրան Մուկուչյանն ըստ էության հաստատեց պատգամավորի մտավախությունները: «Կոնկրետ ընտրատեղամասում գործող սարքերը սինխրոնացված են տարածքային կենտրոնի հետ։ Այսինքն՝ նույն տարածքային ընտրատարածքում ընտրողը երկրորդ կամ երրորդ անգամ չի կարողանա քվեարկել»,- նկատեց ԿԸՀ ղեկավարը՝ հավելելով, որ եթե անձը գրանցված չէ կոնկրետ տեղամասում, ուղղակի չի կարող քվեարկել։ Նման մեխանիզմ է ընտրվել՝ հաշվի առնելով ընտրությունների օրը ցանցային տեխնոլոգիաների կիրառման հետ կապված հնարավոր խնդիրները։
«Ինտեգրալ համակարգի շահագործման ընթացքում, տեխնիկական խնդիրների դեպքում, դա համապատասխան կերպով արտացոլվում է ամբողջ համակարգում և կարող է հանգեցնել ամբողջ գործընթացի ձախողման»,- պարզաբանեց Մուկուչյանը։ Նա նշեց, որ հրապարակված են քվեարկած ընտրողների ցուցակները, ինչպես նաև ընտրական ցուցակների տվյալները, և հետևաբար առանց այս համակարգի կիրառման հնարավոր է ստուգել կրկնակի քվեարկության առկայությունը։
Ղազինյանը ԿԸՀ ղեկավարին մատնանշեց լրացուցիչ ընտրացուցակների հնարավորությունը, «որոնք կարող են համալրվել ողջ օրվա ընթացքում»։ «Այստեղ հարցը հետևյալն է, եթե իշխանություններն ուզում են ընտրությունների արդյունքներն իրենց ցանկությամբ փոխել, ապա այս համակարգը չի կարող կանխել դրանք»,- ընդգծեց նա։ Ղազինյանը մատնանշեց նաև խորհրդարանական ընտրությունների ժամանակ մոտ 100 հազար քվեարկության կտրոնների առկայությունը, որտեղ ընտրողի նկարները չկան։
«Այս ամենը հիմնավոր կասկածներ է առաջացնում կեղծիքների առկայության վերաբերյալ։ Սա, իհարկե, պարզ կդառնա այն քրեական գործի շրջանակներում, որը հարուցվելու է իշխանափոխությունից հետո»,- եզրափակեց նա։
