Զախարովան Հայաստանում ընտրությունների մասին. «Հասարակությունը ծայրահեղ բևեռացված է»

Ռուսաստանի ԱԳՆ պաշտոնական ներկայացուցիչ Մարիա Զախարովան մեկնաբանել է Հայաստանում հունիսի 7-ին կայացած խորհրդարանական ընտրությունները՝ մատնանշելով արևմտյան միջամտությունն ու քաղաքական ընդդիմախոսների նկատմամբ ճնշումները։ Մոսկվայում շեշտում են, որ երկկողմ հարաբերությունների ապագան այժմ կախված է Երևանի գործնական քայլերից։

Ռուսական արտաքին քաղաքական գերատեսչության նախնական գնահատականներով՝ իշխող «Քաղաքացիական պայմանագիր» կուսակցությունը չի ստացել իշխանության մենաշնորհ, իսկ նրա աջակցության մակարդակը նկատելիորեն նվազել է։ Ինչպես հայտարարել է Զախարովան, քվեարկության գործընթացն անցել է «ընդդիմության նկատմամբ աննախադեպ ճնշման և Արևմուտքի, առաջին հերթին՝ ԵՄ-ի կողմից միջամտության պայմաններում»։

Մոսկվայում առանձնահատուկ ուշադրություն են դարձրել հանրապետության ներքին հասարակական-քաղաքական իրավիճակին։ Ռուս դիվանագետը նշել է, որ ողջ նախընտրական քարոզարշավն ուղեկցվել է «հայկական իշխանությունների կողմից կոշտ բռնաճնշումներով», ընդ որում՝ հետապնդումների այդ ալիքի տակ է հայտնվել նաև Հայ Առաքելական եկեղեցին։ Նրա խոսքով՝ հալածանքներն ուղղված են եղել բացառապես այն ուժերի դեմ, որոնք հանդես են գալիս եվրասիական ինտեգրացիոն կառույցներին Հայաստանի մասնակցության օգտին։

Չնայած դրան, ՌԴ ԱԳՆ-ն համոզված է, որ երկրում պահպանվում է «ռուս-հայկական կապերի համաչափ զարգացման լայն պահանջարկ»։ Միևնույն ժամանակ Զախարովան արձանագրել է, որ կայացած ընտրություններն ակնառու կերպով ցույց տվեցին հասարակությունում առկա խորը ճգնաժամը։ Նա զգուշացրել է, որ առանց բոլոր քաղաքացիների կարծիքը հաշվի առնելու միակողմանի որոշումների կայացումը նշանակում է «երկիրը տանել դեպի հետագա պառակտում և սոցիալ-տնտեսական ցնցումներ»։

Եզրափակելով խոսքը՝ պաշտոնական ներկայացուցիչն ընդգծել է, որ Ռուսաստանը միշտ շահագրգռված է եղել ուժեղ և իսկապես ինքնիշխան Հայաստանով: Խոսելով երկկողմ համագործակցության հետագա հեռանկարների մասին՝ Զախարովան ամփոփել է. «Մտադիր ենք մեր ուղեգիծը կառուցել՝ հաշվի առնելով հայկական ղեկավարության իրական քայլերը»։

Կենտրոնական ընտրական հանձնաժողովի տվյալներով՝ Նիկոլ Փաշինյանի գլխավորած «Քաղաքացիական պայմանագիր» կուսակցությունը տարել է համոզիչ հաղթանակ՝ ստանալով քվեների 49,81 տոկոսը։ Երկրորդ տեղը 23,29 տոկոս արդյունքով զբաղեցրել է Սամվել Կարապետյանի «Ուժեղ Հայաստան» դաշինքը, իսկ առաջատարների եռյակը եզրափակել է նախկին նախագահ Ռոբերտ Քոչարյանի ղեկավարած «Հայաստան» դաշինքը՝ 9,94 տոկոս ձայներով։ Գագիկ Ծառուկյանի «Բարգավաճ Հայաստան» կուսակցությանը հաջողվել է ապահովել ընտրողների միայն 4 տոկոսի աջակցությունը։