ԱՄՆ-ն անպատասխանատու է անվանել ադրբեջանական զորքերի առաջխաղացումը Ղարաբաղում

Միացյալ Նահանգները խորապես մտահոգված է Ղարաբաղում ադրբեջանական զորքերի տեղաշարժով։ Այս մասին մարտի 25-ին հայտարարել է ԱՄՆ պետքարտուղարության մամուլի քարտուղարի տեղակալ Ջալինա Պորտերը՝ պատասխանելով Ղարաբաղում իրավիճակը դեէսկալացնելու Վաշինգտոնի ջանքերի մասին լրագրողի հարցին։

«Մենք ուշադիր հետևում ենք 2020 թվականի նոյեմբերին հրադադարից հետո շփման գծում տիրող իրավիճակին։ ԱՄՆ-ը խորապես մտահոգված է ադրբեջանական զորքերի տեղաշարժով: Զորքերի տեղաշարժը և էսկալացիոն այլ գործողություններն անպատասխանատու և անհարկի սադրիչ են»,- ասել է Ջալինա Պորտերը։

Նա հիշեցրել է պետքարտուղարի օգնականի հեռախոսազրույցները Հայաստանի և Ադրբեջանի ԱԳ նախարարների հետ, որոնց ընթացքում նա նշել է հակամարտող կողմերի միջև դիվանագիտական ​​համագործակցության ակտիվացման կարևորությունը։

«Ես կարող եմ հաստատել, որ մեր պետքարտուղարի օգնականը, իրոք, մարտի 24-ին խոսել է և՛ Հայաստանի արտգործնախարարի, և՛ Ադրբեջանի արտգործնախարարի հետ, և նա պարզապես կրկնել է այն, ինչ պետքարտուղար Բլինկենն ասել է վարչապետ Փաշինյանին, ինչպես նաև նախագահ Ալիևին մարտի 21-ին և 22-ին։ Երկու կողմերին կոչ է արել զսպվածություն դրսևորել և ակտիվացնել դիվանագիտական ​​ներգրավվածությունը բոլոր չլուծված հարցերի համար համապարփակ լուծումներ գտնելու համար։ Հայաստանին և Ադրբեջանին ուղղակի անհրաժեշտ է օգտագործել շփման ուղիները անհապաղ դեէսկալացիայի համար»,- պարզաբանել է նա:

Մինչդեռ Պետդեպարտամենտի ներկայացուցիչն հստակ չի պատասխանել լրագրողի հարցին ԵԱՀԿ Մինսկի խմբի գոյության մասին։

«Միացյալ Նահանգները, որպես ԵԱՀԿ Մինսկի խմբի համանախագահող երկիր, խորապես հավատարիմ է կողմերի հետ աշխատելու՝ հակամարտության երկարաժամկետ քաղաքական լուծման հասնելու համար», - հակիրճ պատասխանել է Ջալինա Պորտերը Մինսկի ձևաչափի գոյության և ԱՄՆ միջնորդական ջանքերի մասին հարցին։