Ուկրաինան վերահսկելու նպատակ չունենք. Կոսաչովը որպես օրինակ բերեց Հայաստանը

Ռուսաստանն Ուկրաինան վերահսկողության տակ պահելու նպատակ չունի և չի ունենա: Այս մասին Telegram-ի իր ալիքում գրել է ՌԴ Դաշնային խորհրդի (ՍՖ) փոխխոսնակ Կոնստանտին Կոսաչովը։

Որպես այլ երկրների հետ Ռուսաստանի բնականոն հարաբերությունների օրինակ՝ քաղաքական գործիչը բերեց Ռուսաստանի արտաքին քաղաքական փոխգործակցության մոդելը Եվրասիական տնտեսական միության երկրների, այդ թվում՝ Հայաստանի հետ։

«Պետք չէ ապացույցներ փնտրել, պարզապես նայեք Ռուսաստանի հարաբերություններին իր ամենամոտ դաշնակիցների՝ Բելառուսի, Ղազախստանի, Հայաստանի և Ղրղզստանի հետ (ես որպես օրինակ վերցրել եմ ԵԱՏՄ-ն): Ո՞վ կպնդի, որ Ռուսաստանը վերահսկում է այդ երկրները:

Ռուսաստանը կարող էր վերահսկողության տակ պահել այդ երկրներին, բայց դա միտումնավոր չի անում՝ հարաբերությունները կառուցելով հավասարության և պետությունների ինքնիշխանության հարգման սկզբունքների վրա»,- գրել է նա։