Լավրովը ասել է, թե երբ կբանակցի Ռուսաստանը Ուկրաինայի հետ

Ռուսաստանի արտգործնախարար Սերգեյ Լավրովը հայտարարել է, որ Ուկրաինայի նախագահ Վլադիմիր Զելենսկին ստում է, երբ խոսում է Ուկրաինայի չեզոք կարգավիճակը քննարկելու պատրաստակամության մասին։ Նախարարի խոսքով՝ Ուկրաինայի ղեկավարն ինքն է վատնել անվտանգության հետ կապված բանակցությունների հնարավորությունները, գրում են ռուսական լրատվամիջոցները։

Ավելի վաղ Վլադիմիր Զելենսկու գրասենյակը հայտնել էր, որ Կիևը պատրաստ է բանակցությունների Մոսկվայի հետ, սակայն դրա դիմաց Ուկրաինան պետք է ստանա անվտանգության երաշխիքներ։

ՌԴ ԱԳ նախարար Լավրովը հայտարարել է, որ Ռուսաստանը բանակցություններ կսկսի, երբ Ուկրաինայի զինված ուժերը վայր դնեն զենքերը։

Նախարարի խոսքով՝ Ռուսաստանը Ուկրաինայի ներկայիս իշխանությունը ժողովրդավարական ճանաչելու հնարավորություն չի տեսնում։

«Ռուսաստանը կապահովի Ուկրաինայի ապառազմականացումը. Ռուսաստանը կապահովի Ուկրաինայի ապաազգայնացումը. Մենք չափազանց շատ ենք տուժել նացիզմից, իսկ ուկրաինացի ժողովուրդը տուժել է նացիզմից, որպեսզի աչք փակենք այս ամենի վրա և այդքան անլուրջ նայենք»,- ասաց նա։